笑笑小語錄 @ 36 個月

原本係想打篇 成長進度 @ 36 個月

但.... 唔知從何入手   打唔到字出黎

你話佢有冇長大? 有冇改變??

當然有啦~ 

坦白講... 冇小時候變得咁快囉!

**********************************

飲食呀~ 作息呀~

完全冇乜點變

自理能力呀~ 肌肉發展呀~

差不多咁

說話及認知能力~

唔! 你問我... 佢識乜? 我而家真係答唔到你，太多了!

佢鍾意的.... 佢會好快好易咁記左入腦

唔鍾意的.... 佢記左都會答你佢唔記得

你話.... 我點寫好呢?  哈哈~ 

性格及行為方面~

呢方面更加唔會變啦! 

『愛發脾氣、易炆、易喊、易笑、硬頸 、粗魯 、勁嗲』

不過唯一我可以肯定的是

佢高左、重左、大個左、懂性左

哈哈~

所以.... 將 成長進度 改為笑笑小語錄吧!

**********************

笑笑小語錄: 

【口甜事例  (一)】 
有日夜晚準備一齊瞓覺時，小霸王要求要同爸B瞓 (其實係佢唔想瞓住，先咁講)
小: 我想同爸B 瞓
我: 好呀! 你咪同爸B 瞓囉!  我自己瞓啦!
唔知係咪佢發現我唔開心，佢居然....
小: 媽咪呀~ 媽咪你D 頭髮好靚呀~
我: .........
小: 媽咪，點解你D 頭髮咁靚o既?
我: Thanks Baby (我真係偷偷笑 ♥)

【口甜事例  (二)】
有日早上，我約左醫生打針，咁我就叫小霸王跟住婆婆、舅父去食住早餐等我
我: 媽咪約左醫生打針針，你拖住舅父去食早餐等我
小: 媽咪唔打針針呀!
我: 唔係你打，係媽咪打呀!
小: 媽咪唔好打針針
我: .......
小: 媽咪唔打針針 (爆喊地重覆咁講)
我: 好啦!! 媽咪唔打針針  (唯有講大話... 話去攞錢)
雖然唔知佢係真係心痛我定係自己驚，但o個刻個心係好甜架!!


【頂嘴事例】
而家晚飯後我都盡量俾水果小霸王食，因為佢下午堅決拒絕6299，所以交返俾我 handle，但佢又點會咁順我意呀!
我: BB，食咩水果呀?
小: 媽咪，我唔食 apple 呀! 你食啦 ! (佢見我切緊APPLE)
我: 咁你想食咩先? kiwi? watermelon? dragon fruit? orange? 
小: 媽咪，你食啦!
我: 唔得，要揀一樣，唔食 apple 就食 kiwi 啦
小: 媽咪，我唔食 kiwi 呀! 食 apple啦!
我: 好呀! 食 apple  (餵佢時，佢又話唔要，又喊晒) 
我: 你唔乖，媽咪 so sad! (我扮唔開心)
小: 媽咪，no sad. 媽咪，happy
我: 咁你食 apple or kiwi?
小: 咁食 apple 啦! 細細啖.....
餵食水果真係一個大難題，軟同硬都要出晒先攪得掂!

【激氣事例】
一向做事比較急的我，真係唔好意思地將佢遺傳左俾小霸王，所以佢都好急下架
小: 媽咪開唔到呀?
小: 媽咪唔得呀?
小: 媽咪 click 住左呀?
小: 媽咪冇呀?
小: 媽咪行得未呀?

佢講得最多的係"媽咪唔得呀?"，我會答返佢"慢慢黎"， 佢又重覆"媽咪唔得呀?"，唉.... 你再咁講媽咪就真係唔得嗱!


【攪笑事例 (一)】
有一晚家庭聚會，係酒樓食飯，大家係到閒談中....
爸: 細佬仔，好叻喎! 
小: 咁我唔叻咩?
爸: ........

大家都俾小霸王突如其來的回覆嚇左一跳.... 笑四人呀!! 


【攪笑事例 (二)】
有一日早上，我起床去刷牙洗面，之後係房門隙見到小霸王醒左仲瞓左我個位，咁我咪諗住用手機靜靜雞偷影佢，點知俾佢發現左仲.....
小: 媽咪，你係到仲乜呀?
我: 冇呀，想偷影你咋嘛!

小: 媽咪，你唔洗偷影我啦，你入黎影咪得囉!

我: ...... (無言! 好似狗仔隊俾人發現左咁)

Welcome to S.K.Y. Lovely Family