▌台北遊 ▌ ● Day 3 ♥ 九份 / 十份 / 猴硐貓村 / 台北101

DAY 3 行程:  

台北花園大酒店 →   McDonald (早餐)  →  九份老街 →  九份金瓜石陰陽海 

→ 十份大瀑布/十份老街/放天燈  → 猴硐貓村 → Eatogether (信義店)  

→ 台北101 觀景台 → 台北花園大酒店

五日行程中，唯一一日包車遊

最舒服 - 係架! 有人車出車入 (小霸王當正UBER咁)

最緊湊 - 去的地方都多架

最多相 - 靚景點都要不停影啦!

呢一日約左司機 9:30 黎酒店接我地，

所以就近近地係對面麥記食早餐，價錢味道同香港差不多!

司機準時9:30到達，YEAH !! 出發

第一站 - 九份老街

到達九份大約10:30左右，時間叫尚早吧!

所以唔算十分多人，我地預左逗留1.5小時，可以輕鬆行

阿珠雪在燒 - 一般，雪糕味道唔太甜，滿足下小朋友

茶葉蛋 - 我唔知，小霸王自己KO晒一隻，應該唔錯吧!

九份的風景真係好正呀!!  

可惜話咁快就要去下一站... 哈哈~ 

(走時12:00 未夠已爆多人)

第二站 - 九份金瓜石陰陽海 

呢個景點係司機提議的，唔錯! 

望下海、吹下風，好舒服

第三份 - 十份大瀑布 

哇!! 真係好靚呀~  

要睇正一正的瀑布估唔到要行一段距離的路+樓梯

由於太近瀑布，D路都好濕下，真係要好小心 (仲要好多蚊)

第四站 - 十份老街 

小霸王最期待的景點之一，因為佢好想放天燈

未放天燈前，我地選擇周圍影相+食野先

放天燈啦~ 一個彩色天燈約 NT150-200，唔算貴

四面都可寫上你的願望

有專人幫你揸機影相，有專人教你放，真係好抵放!!! (哈哈)

放完天燈都差不多四點，快手去多個景點先

第五站 - 猴硐貓村

貓迷必到的地方，呢到真係好多貓

小朋友真係玩到特別開心

噢... 係時候返台北囉! 

司機車返我地去台北101隔離的ATT 4 FUN百貨

包車行程結束，我地自行時間開始

呢晚BOOK 左近期好出名的台北自助餐 - Eatogether (信義店) 

平日 大人NT$ 798+10%, 小童NT$100 

(任食四小時 17:30~21:30)

我地掛住食，唔記得影相囉!! 哈哈

呢到都叫做好多野食，如果係HK，呢餐我估都要$500/人

真係食到肚漲先走人 (我地只係食到19:00就走)

同一個商場  梗係要去朝聖啦!

點知.... 我家大小的... 連甜品都唔肯陪我入去食

只好偷偷地影相留個念吧! 

(不過~ 返到HK先知，做到二月就會關門)

咁又真係.... 晚飯時間.... 得一兩枱有客人咋! 點繼續呢??

冇得朝聖... 睇夜景補數都唔錯

台北的夜景  不錯!  

(但好似香港靚D，哈哈!)

玩飽，行飽，食飽，睇飽...

返酒店啦~ 

真心推薦:

呢日包車真係好抵! 服務好!

- 價錢: NT3000 包8小時 (我地超時20分鐘都冇額外收錢)

- 司機準時、態度好、友善、健談

台灣包車/台灣自由行包車/九份十分包車: https://www.facebook.com/airportpick/

Info:

Eatogether: http://www.eatogether.com.tw/shop.php?mID=1&sub=1&shopID=10

台北101 觀景台: http://www.taipei-101.com.tw/observatory-info.aspx#SCROLL1

想睇下其他台北的遊記，請 Click 入  ▌台北遊 ▌ ● 全集 ~ ♥

▌台北遊 ▌ ● Day 2 ♥ 兒童新樂園 / 淡水老街 / 士林夜市

DAY 2 行程:  

台北花園大酒店 →   花嘴廚房 (早餐)  →  

臺北市立兒童新樂園 → 淡水老街 → 士林夜市 → 家樂福 → 台北花園大酒店

旅行前資料搜集過西門町/酒店附近  有咩出名的食早餐地方，

係唔多選擇架!! (好多都冇咁早開門)

最後.....揀左其中一間好多人介紹的 花嘴廚房  (另一間之後再介紹)

以西式早餐為主的花嘴廚房

我地叫左兩份NT105的早餐，包含吐司、香腸/魚柳、炒蛋、沙律、飲品一杯

味道可以接受，但係.... 食物唔係熱架囉? 整體OK啦!

(你知我地港式早餐係熱架嘛!!)

食飽飽，出發啦!! 行去西門町坐捷運!!

Day 2 第一個行程以小霸王為主 - 臺北市立兒童新樂園

由西門町去的話都好方便，坐捷運去到劍潭站，

出站後，左手面好多公車站，坐兒樂2號線，總站 - 兒童新樂園站落車就到

(全程大約45分鐘)

YEAH!! 到啦~  

入場門票: 成人 NT30，6歲以下兒童免費入園 

(入場及各樣遊樂設施都可用悠遊卡俾錢，勁方便!!)

兒童新樂園的入場費用真係好抵，不過入左場後，

大部分遊樂設施都係每次收費，大約NT20-30 (大小同價)

其實都好，好似小霸王咁，佢唔係樣樣都會玩，

佢想玩的唔多，所以相對上會平好多

轉轉咖啡杯、星空小飛碟、海洋總動員、水果摩天輪、卡哇依親子堡

計埋入場+零食，都唔過NT500 (三個人，HK$130左右咋)

可以玩到半日 (3小時) 都幾抵玩架!!

下一個行程 - 淡水老街 

坐返公車兒樂2號線/兒樂1號線 去士林/劍潭站，坐捷運淡水信義線往淡水）=> 淡水站

(車程大約30分鐘)

十年後再黎，變化好大，假日的淡水迫到寸步難行，好熱鬧!!!

大家都係黎... 食飲玩!! 我地都唔執輸，GOGO

老街水產阿給 - 一般啦，口味唔太岩我地

緣味古早味現烤蛋糕 - 原味蛋糕好好味，軟綿綿，鬆軟

             花枝道 - 好熱氣，試下就算，哈哈!!

由淡水老街慢步去漁人碼頭，只係一小時左右

 (太多人唔想排坐船，行可能仲快)

情人橋，冇行上去，遠望下好啦! (行得太多，唔想再行，哈哈)

跟住再坐公車出返去淡水老街睇日落，好靚!!

睇完日落，我地就去近近地的士林夜市

一定要玩呢個.. 釣蝦!! 

回味一下十年前的回憶，上次好似冇收獲，

今次陪囡玩，居然釣到2隻呀!! 勁!!

跟住入左市場行下，再落地下層搵野食! 

蚵仔煎、蚵仔湯... Yummy!!

食埋晚餐就返酒店，見時間尚早(8點左右)

就行埋對面的家樂福

估唔到行家樂福仲開心過行其他地方

呢位小魚迷同D 擺POSE 真係唔同D，哈哈!!

Info: 

花嘴廚房: https://www.facebook.com/whatdaykitchen/

臺北市立兒童新樂園: http://www.tcap.taipei/mp.asp?mp=122037

想睇下其他台北的遊記，請 Click 入  ▌台北遊 ▌ ● 全集 ~ ♥

▌台北遊 ▌ ● Day 1 ♥ 西門町 / 上引水產 / 台北101

DAY 1 行程:  

屋企 → 香港機場 → 台灣桃園機場 → 台北花園大酒店 →   西門町 (牛軋堂) / 西門紅樓  →  

上引水產 → 台北花園大酒店 → 台北101 → 西門町 → 台北花園大酒店

EVA AIR 早機去台北的時間有其他時間，有班好似大約係7點幾飛的，

但我見飛台灣機程約個半鐘左右，唔想小朋友咁辛苦要太早起身，最後就揀左9點幾O個班

咪講笑，就算九點幾機，我地都要6點幾出門 (O個日天都仲黑架)

估唔到去到機場check in & 寄行李 好順暢 (我估太早吧!)

我地先去食個早餐才入閘口，好彩我地有多時間過關咋(大約1.5小時)

因為勁多人，係排到冇位剩 (打晒蛇餅，未到假期都咁多人)

順利過關、上機、準時起飛

原先諗住.... 飛機餐應該係D餅呀~三文治呀~ 

點知.... 係真係飛機餐囉!! (出奇地好味架!)

機程短真好，小朋友自己寫下字、玩下玩具、瞓一陣就到，所以小霸王都算好合作! 

到達台灣桃園機場，辨理入境、取回行李、換台幣、搵埋車站、買埋國光客運 1819

一小時唔洗攪掂晒，勁快手! 點知.... 就出事!

巴士離開機場上左高速公路 (pat pat 都未坐暖架)，小霸王話佢要去weewee....

吓....真係大意! 我地上車前唔記得左帶佢去廁所.... 點算?? 

冇計，唯有叫佢忍住，問左司機有冇站停? 

最後...... 我地就決定『有站即落車』 (原本總站先落車)

好彩，我地早落車的站正正係圖書館，問題解決! 真好! 

呢個小小的大意，卻令我地有機會參觀下台北的圖書館也不錯!

亦幸好有好多窩心的台灣人幫手，我地先可以順利地到酒店

時間仲比我預期的早到酒店，YEAH!!

到達酒店先CHECK IN及寄存行李 (未有房)

跟住我地就開始我地台北5日4夜之旅  

由於比我預期早左差不多1小時，可以輕鬆地由酒店行去西門町搵野食

10年冇黎的西門町  感覺上冇乜點變  (依然係勁勁勁多人)

西門紅樓維修中，只好跟佈景畫影相留念!

跟住旅遊書去試食牛軋堂

清燉牛肉幼麵(小) 、紅燒牛肉粗麵(小)、麻醬涼麵

我唔食牛，所以.... 味道我就唔多知

但係連小霸王+爸B都話好味道的話 (一路食一路話好味)，應該不錯吧! 哈♥

食飽飽後，我地就行左一陣西門町

之後就坐捷運+公車去下一站 - 上引水產

由西門町出發的話，先坐捷運松江南京站 4號出口，

在民權松江路口坐公車642，於臺北漁市站下車，再步行幾分鐘就到

(全程連等車大約45分鐘)

我地一落公車，小霸王就見到第二果菜市場，勁開心!! (睇水果都可以咁開心)

水果唔算特別平，但好靚，我地買左台灣蓮霧 (返酒店慢慢食)
睇完水果...行一陣就到臺北漁市，隔離入口就係 上引水產

 上引水產

入口入到去，哇!! 好多海鮮呀~ 有超市~ 有生熟野食~

我地就揀左企位食，哇!! 真係好正、好新鮮!! yummy!! 

食埋野都只係 6點未夠，我地就返酒店休息下先再出去行

休息完，我地就去近近地的台北101

諗住去下個法國村，點知.... 爆晒，勁多人，想行都行唔到

唯有走人，好彩台北101 附近都好多聖誕裝飾

好讓我地提早感受下台北的聖誕

跟住我地又返去西門町食宵夜

估唔到阿宗麵線接近10點就收檔的時間，都係排晒長龍，排左20分鐘終於有得食。

食飽、行飽..... 返到酒店真係身心肚都疲累呀! 

PS: 

台北的交通費真係好平 (同香港比，真係平到笑!!)

如果好似我地一家三口咁，我建議大家可以買張悠遊卡/台北觀光護照，真係方便好多!

悠遊卡: 

= 八達通，買卡時要俾NT100 按金 (不設退卡及退按金)，隨你個人增值。

搭台北捷運，可享每次車資8折之優惠。享有台北捷運、公車 " 雙向轉乘 " 優惠。

** 以我家5日行程，唔計包車，每位成人都不超過NT500 (計埋按金) *

台北觀光護照: 

分1,2,3,5日PASS，於有效使用天數內可不限次數搭乘台北捷運、台北聯營公車、新北市市轄公車。 當你買5日PASS，平均一日NT140，但係.... 我計過好似我咁一日走幾處都唔過NT140，就真係唔係好抵，所以大家要計下!!

Info: 

國光客運 1819 - http://www.kingbus.com.tw/ticketPriceResult.php?sid=104

牛軋堂: https://www.facebook.com/%E7%89%9B%E8%BB%8B%E5%A0%82-158683374170975/

上引水產: http://www.addiction.com.tw/#aquamarine_ct

悠遊卡: http://www.easycard.com.tw/easycard/01/buy.asp

想睇下其他台北的遊記，請 Click 入  ▌台北遊 ▌ ● 全集 ~ ♥

▌台北遊 ▌ ● 準備篇

1. 機票 - EVA AIR (長榮)

Flight:
17 Dec 2016 - BR892   (Dep. Time: 09:50 / Arr. Time: 11:30) 
21 Dec 2016 - BR857   (Dep. Time: 18:10 / Arr. Time: 20:00)
** 早機去，晚機返 **

票價:   成人            HK$1390  (機場稅+燃油費: HK$334)  
           小童            HK$1050  (機場稅+燃油費: HK$214)  
-----------------------------------------------------------------------------------
總數:  HK$4712

** 早機去，晚機返 **

** 每人包30kg 行李 **

比較過同時段的其他航空公司，價錢唔差太多 (一二百左右)。最後揀坐EVA AIR 的原因係.....滿足下我家的小Kitty迷，雖然Kitty機冇再飛香港，但只有EVA AIR 機先會用桃園機場T2， T2 有個Kitty 迷你遊樂場+shop，所以.... 冇得唔揀啦!! 

So far EVA 都不錯，準時、服務不錯、座位唔算太迫 (可以接受)、飛機餐都唔差! 

HelloKitty EVA AIR: http://www.evakitty.com/tw/experience/story.html

2. 酒店 - 台北花園大酒店

價錢:

17/12 to 20/12 四晚       HK$1734/成人 (不包早餐)

-------------------------------------------------------------------------------------

總數:  HK$3468

對上去台灣已經是十多前的事，所以都唔係咁知咩酒店好? 姨媽媽住過話呢間OK就BOOK

So far 都不錯，地點唔算話十分方便 (距離小南門站5分鐘，行去西門町10-15分鐘)，但冇咁雜同嘈。 環境都乾淨整齊。

Taipei Garden Hotel: http://www.taipeigarden.com.tw/zh-hant/

3. WIFI - 台灣大哥大

深水埗鴨寮街多的是，我地買左張HK$100 7日任用，簡直夠晒呀!

4. 旅遊保險 -- Hang Seng 

價錢:

地區#2  4-5日   HK$257 (自己及配偶及子女*)

-------------------------------------------------------------------------------------

總數:  HK$257

https://bank.hangseng.com/1/2/chi/personal/insurance/travel-leisure/travel-insurance/travel-premium#01

5. 外幣找換

香港機場有... 台灣機場都有...

找得多的話 (過二千)，我見對換率係一樣架?  不過我都係去到台灣機場先找換，唔心急的話，出左外關先找換都得，相對上冇咁多人!

6. 行程總消費

機票:    HK$4712

住宿:    HK$3468

保險:    HK$257

WIFI:   HK$100

消費:    HK$7000

-------------------------------------------------------------------------------------

總數:  HK$15,537

台北主要都係食食食，車費平，食野又平，買野就,.... 一般啦! (唔多吸引)

想睇下其他台北的遊記，請 Click 入  ▌台北遊 ▌ ● 全集 ~ ♥

▌台北遊 ▌ ● 全集 ~ ♥

今年的 Family trip 要延後，

因為今年係姨媽姨丈結婚十週年，佢地要去馬爾代夫慶祝， 我地就唔做電燈泡囉!!

所以唯有我地三人去第二到玩住等，哈哈!!

我地揀左近近地的台北，輕輕鬆鬆咁玩五天

We ♥ Travel

We ♥ Share

▌台北遊 ▌ ● 準備篇

▌台北遊 ▌ ● Day 1 ♥ 西門町 / 上引水產 / 台北101

▌台北遊 ▌ ● Day 2 ♥ 兒童新樂園 / 淡水老街 / 士林夜市

▌台北遊 ▌ ● Day 3 ♥ 九份 / 十份 / 猴硐貓村 / 台北101

▌台北遊 ▌ ● Day 4 ♥ 木柵動物園 / 貓空纜車 / HK Shabu-Shabu

▌台北遊 ▌ ● Day 5 ♥ 中正紀念堂 / 國立台灣博物館

▌台北遊 ▌ ● 戰利品篇

我的十天新年假期

每到農曆新年  就係要放長假的日子  (公司規定，要扣大假)

公司由年三十收爐  年初八先開工

剛好星期六我短週  足足連續放十日假

小霸王知道我有十日假  不知幾咁開心呀!  (真的!  我都好開心!)

能夠十日痴住一齊  呢D 咁正機會真係唔係成日有  珍惜!!

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

假期第一天  (年三十)

辦年貨?? 唔係啦!  講真，除左買自己同小霸王野

又真係冇乜野辦，屋企的都是6299攪掂 (♥幸福♥)

我地去左屯門行下街、買下野、食下野

好 Enjoy 兩母女行街街  小霸王會好樂意為我/自己揀衫  仲有玩具囉!!

(我終於等到個伴陪我Shopping，生囡真好♥)

日頭行完   估唔到夜晚我地又出動

今年去左屯門行花市   (第一次咋)，呢到個花市比元朗細好多，冇乜野行

只係小霸王有收穫.... 一盤大吉 + 風車

佢話: 『大吉大利』.... (笑左....^_^)

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

假期第二天  (雞年●年初一)

行程:  拜神 (婆婆娘家)  --> 老家  (年年不變)

恭喜發財  年年有餘

大吉大利  身體健康

龍馬精神  花開富貴

今年認識多左唔同的祝賀語，所以見到唔同的人，佢都會講不同的祝賀語

知道同明白逗利是係小朋友的專利

另外，今年終於都有機會著到親子唐裝衫

顏色就揀左小霸王最鍾意的粉紅，哈哈!!

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

假期第三天  (雞年●年初二)

行程:  酒樓開年  --> 嫲嫲娘家  --> 媽咪娘家  --> 姑婆家

小霸王繼續PINK控出動

今年行程上有少許加左，為左唔想婆婆咁辛苦

改左去姑婆屋企食盤菜+團拜

小朋友就"魚蝦蟹"、大人就"打麻雀"

熱熱鬧鬧過一天

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

假期第四天  (雞年●年初三)

行程: 屋企

赤口  我選擇留在家

因為前一晚玩到十二點先返到屋企，呢一日就留家休息

我家的年花.... 開得好靚呀!

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

假期第五天  (雞年●年初四)

行程: 屋企 + 附近

由於爸b 新年期間冇假放，所以往後幾日就我地自己去wet

留家休息一日後，諗唔到去邊就簡簡單單去下公園 + 燒錢樂園玩吧!~

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

假期第六天  (雞年●年初五)

行程: 觀塘APM --> 觀塘海濱公園

呢日出動去搵Sandy 姨姨食lunch同拜年

食完之後就行去近近地的海濱公園玩下、影下相

outdoor+自然光  真係可以影到好多滿意的相片

當然好開心小model 肯合作

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

假期第七天  (雞年●年初六)

行程: 奧海城  --->  荔枝角公園

連續兩天都要去芭蕾總校考mock

第一天 考試時間: 15:00

考完都係4點唔夠  所以就去左荔枝角公園輕鬆下

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

假期第八天  (雞年●年初七)

行程: 奧海城  --->  荔枝角D2 Place

繼續去芭蕾總校考mock

考試時間: 16:00

考完試都接近5點  所以就去左荔枝角D2 place (順便等爸b收工)

我諗因為新年同平日 所以好多鋪頭冇開  感覺上冇乜野行 

但去呢到主要為左影相 【天台花園許願樹】

雖然地方唔大+迷你假桃花，但影相都唔錯!  

D2 Place: https://www.facebook.com/D2Place/

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

假期第九天  (雞年●年初八)

行程: 婆婆娘家  --->  婆婆家

呢日小朋友化身小農夫拔蘿蔔，大人就拜神求簽

三老表一齊  感覺小霸王特別開心

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

假期第十天  (雞年●年初九)

行程:  婆婆家

姨媽姨丈去左日本旅行  好開心可以照顧呢3個小寶貝半日咁多

(好佩服 多小朋友的媽媽，真係幾辛苦下，但幸福的)

三大拖三細 算是輕鬆  只係出外走走 食下野  買下玩具

小霸王得到佢想要的BB車  (謝謝 舅父)

十日假期，咁快就完結

除左我個人唔多想返工，小霸王都有點失落

小霸王:  媽咪，你唔返工得唔得呀? 放多二十日、三十日得唔得?

我梗係想啦! ~ 媽咪努力D呀!~ 爸B都努力呀!~

不過我個人都係想Keep住返工，因做全職媽媽唔係咁易

仿且，小霸王開始大，好似冇咁需要時時刻刻陪住佢

間中痴埋一齊好似仲甜蜜! ♥