剛剛結婚 6週年收花的一刻開心之餘
突然有個想法..... 就係我收過多少花呢?
有個朋友仔由我拍拖開始見住我收花
因佢係我舊同事，所以..... 佢實見到
佢話: 次次都有花收
我心諗... 邊係成日呀? 肯定唔係年年有得收... 仲好耐先有得收呀!
就係佢呢句話 ♥ 令我想回憶下自己收花的開心 ♥ 哈哈~
從我與爸B開始拍拖的 2003年開始找尋
呵呵~ 原來我收過有12束花架! (有咁多咩? 我自己都唔覺，哈哈~♥)
來一一回味下先
Flower NO. 1
2003年 2月4日，收到我人生的第一束花，是我最愛的百合花。
好記得佢係親自送黎我公司的，攪到全公司 / 我屋企人都知我拍緊拖啦!
Flower NO. 2
2003年 2月14日，係呀! 唔洗兩星期我又收花，同樣是我最愛的百合花。
我地的第一個情人節，望住 2003年的相片，我真係想.....點解咁腫脹架塊面?
其實呢個時候係我人生中最肥的日子 (唔計懷孕)
偏偏佢最鍾意我呢個樣 ♥ Crazy.....
講真... 我都係最鍾意佢當時的身材.... 哈哈~
Flower NO. 3
2003年 8月7日，我的生日的前二天(百合花)
呢段時間，我地係冷戰中 (分手邊緣....)
亦係我地暫時唯一一個冇一齊渡過的生日
最後梗係.... 冇事啦!! (唔係點會有小霸王呢?)
Flower NO. 4 & 5
2007年 2月14日，情人節之花 (黃玫瑰)
記得收到呢束花，我個人都好意外，因為當日係唔洗返工，
我曾對佢講過唔洗返工的情人節就唔洗送花啦!
估唔到佢呢次係搵人送黎我屋企喎! Surprise ♥
2007年 8月18日，求婚之花 (百合花)
求婚咁大件事點可以唔送花呀? 係咪.... 哈哈~
Flower NO. 6
2008年 8月9日，生日之花 (百合花)
我記得我收花o個刻好攪笑囉!!
事緣係我地明明約定呢日下午尖咀等，點知有人零晨靜靜地來我家，
將花放在我面前再拍醒我，我當時瞓到豬咁，以為發緊夢再繼續瞓
點知..... 原來係真的，係半夢半醒下收花，勁攪笑! ♥
Flower NO. 7
2009年 1月26日，新年之花 (一盤 3支鬱金香)
第一次收用盤種住的鬱金香，好特別+好攪笑
有人話唔想情人節又送百合，所以買開年花見到就買黎送俾我
Flower NO. 8
2010年 2月13日，年三十之花 (一支肥皂玫瑰花)
呢一年情人節係年初一，所以年三十時同佢行花市，
佢任我揀想要乜花，最後.... 我只係要左呢支肥皂玫瑰花，
唔想浪費金錢嘛! (始終... 結左婚就.... 佢的錢就係我的錢)
Flower NO. 9
2010年 11月27日，結婚一週年之花 (百合花)
暫時咁多個結婚週年中，真係只有一週年先有慶祝下
我記得係一家人+朋友仔一齊 BBQ，除左花，仲有蛋糕切架!♥
Flower NO. 10
2012年 7月13日，生女之花 (橙色玫瑰花)
估唔到生完女有花收囉!! 哈哈~ (唔係應該收鑽石呀~ 樓呀~遊艇呀~ 架咩?)
老公話.... 我手飾唔多帶... 名牌野又唔好.... 喎~
不過呢一日又真係人生其中一個好重要的日子
Flower NO. 11 & 12
2015年 2月13日，情人節之花 (紅色玫瑰花)
2015年 11月7 日，結婚六週年之花 (粉紅色玫瑰花)
說真的，收到呢兩束花我真係好意外囉!~
我第一個感覺係.... "咩事呀佢? 做左D 乜錯事先?" 哈哈~
不過真係好開心佢終於明白"做人老公間中應該要對老婆做下D浪漫事"
相信大部分女人都鍾意收花的，雖然我地口中成日會話浪費金錢，
但收到o個一刻真係好開心好幸福的 ♥
(真係o個一刻架咋.... 之後要自己攞返屋企，真係不好受! )
12 束花見証住我地相愛 12年的日子
不是很長，也不是短
往後的日子我地都要 ♥ 繼續相愛 ♥ 繼續幸福 ♥ 繼續快樂 ♥
♥ Love Forever and Ever ♥
Welcome to S.K.Y. Lovely Family
)
