♥ Emax Sanrio Game Master ♥

好早前我已經知道 EMAX 有個 Sanrio 活動

年年都有攪.... 但我就一次都冇去過

因為 入場劵唔平(大人小朋友同價)、消費唔平、怕人多...

所以都係唔好洗錢仲要咁辛苦

(仿且我鍾意的布甸又係配角，唔去都唔會可惜)

呵呵~ 今年居然有得免費去玩，梗係𦧲飯應啦! 

♥ (特別嗚謝: Sandy 姨姨提供免費飛 + 陪玩) ♥

呢日上午陪完小霸王返學後

就換衫出發去九龍灣等Sandy 姨姨收工一齊去EMAX

為左避開午餐時間，我地就入到EMAX 先求其搵間野食

2:30 食飽飽就入場囉!!

人龍??? 冇囉!!  完全唔見 

只係排左 5分鐘唔洗就入得去

仲有時間慢慢影好相先入場

一入到去你會見到大大間 HELLOKITTY 屋 + 車

好鬼靚囉!!   好可惜架車係坐唔到入去，坐到就正

HelloKitty

主角真係唔同D，影相位多到..... 靚到....♥

間屋仔都幾靚架，但就唔多影相位囉! (失望~)

跟住就係..... 80後年代都幾HIT 的

Patty & Jimmy

小霸王同佢地影相，算係最合作的...

其他.....

Kuromi & Gudetama

佢對 Sanrio 公仔真係唔多有興趣 

(除左布甸狗+kitty 貓之外)

反而係對地下的..... 突如其來魚仔有興趣多d 

佢自己發現左，仲叫我幫佢影相，難得的是.... 不用大聲叫佢望鏡頭

SO FAR D 公仔都做得幾得意、幾可愛

但環境太暗+ MODEL 仔唔多合作，真係好難影到靚相

呵呵~  ♥ 我最期待的位置 ♥

PomPomPurin

太小吧!! 明明網上係勁受歡迎的.... 

點解得咁小呀???? 

My Melody

Gudetama

真係估唔到唔洗半小時就已經影晒相囉!

唯有就任小霸王自己周圍行下

佢揀左最辛苦的地方 ~ Hellokitty 間屋

佢唔辛苦的，因小朋友好鍾意行樓梯

但我呢... 要跟上跟落.... 來來回回都唔知行咗幾多次

一向係 Sanrio fans 的我   覺得入去影下相係不錯的

但入場費就貴左d 囉! (最平$100/人, 大人小朋友仲要係同價喎!)

玩遊戲仲要係另加錢玩，又有時間限制  (大人玩就可以，小朋友就....)

所以..... 小朋友太細的話，就唔係十分值得去

Welcome to S.K.Y. Lovely Family
Date:   2015.08.21 (Fri) ~ 3y1m8d 
Place:  Emax Sanrio Game Master

K1 班 ~ 校長的分享及問題

前文都有提過小霸王K1適應週中

我會有半小時係同佢分開的

而呢半小時呢~  所有家長都會去禮堂聽校長的分享

每日分享的內容都不同

校長會分享一D 平常生活中

如何教導小朋友

例如:

●  早睡早起，飲食上要點注意

●  家長應該讓小朋友多嘗試、多鼓勵、多讚美

●  家長與小朋友溝通時要多D 正面說話 (唔好帶有負面)

●  對小朋友的愛錫要"在心中"，要俾佢地自己你地係佢父母，要尊重你地

校長問左家長兩個小問題

1. 點解你會做爸爸媽媽??

2. 你想你小朋友將來係點?

呢兩個睇落好簡單的問題，但係.... 又會令你答不出答案

咁當然.... 係冇一個正確答案   (人人都不同)

會令你"停一停、諗一諗"

我亦都有問過爸B    佢的答案係..... 

1. 冇點解架喎，想做咪做囉

2. 吓，冇諗過喎!

你話係咪答左 = 冇答過呢?

咁我又唔可以話佢錯O既，因為呢個係佢的諗法

而我呢???  我諗左一星期... 每日都有不同的答案咁

1.  點解你會做爸爸媽媽??

● 因為 6299 想抱孫囉!  (即係"傳宗接代)

●  因為老公想要小朋友囉! (即係"想有愛情結晶品")

.....................................

雖然以上一直都係追迫緊我要生BB 的原因

但... 我覺得我唔係因為呢D原因而做媽媽囉!

(其實我有講過的 懷孕的前後感受)

我記得我結左婚兩年左右，老公無時無刻都有追我生

但我都退縮... 因為生BB 唔係想像咁簡單

直至家中的長老一個一個咁離開

而我最愛錫的婆婆亦病左，佢仲話自己唔會好長命

O個刻就諗.... 如果能夠係婆婆在生時抱多個曾孫，不是更好嗎?

而且... 我亦發現生命係好無常，他朝一日，

我倆其中一個離開，咁餘下的.. 咪會好孤單囉!!

所以我就決定生BB 做媽媽啦!

(個原因係有D長.... 但... 真心話)

2. 你想你小朋友將來係點?

●  開心、快樂、可以做自己喜歡做的事情

●  獨立、堅強、勇敢

●  健健康康、無憂無慮、簡簡單單

●  幸福，找到一個愛錫佢的人

●  懂得感恩的人

●   愛錫自己，亦能愛錫身邊的人

能夠真係做到的，簡直係完美啦!   哈哈~ 

做到一半我都安慰~ 

不過我真係好希望佢會懂得感恩   

(我唔係基督徒，但我好鍾意"感恩"呢二個字)

講真，而家小朋友物質太豐富

可以話要乜有乜，父母就算幾辛苦都盡自己能力去滿足佢地

但係.... 佢地只會覺得"只要我出聲就乜都有"，得來太容易

連小小感謝都沒有  (即係"老鳳"咁)

所以"懂得感恩 "真係好小有架啦~ 

好長氣咁講完我答案，

唔知你地心中又有咩答案呢?

校長最後派左張幾有意思的咭仔俾家長

同大家分享下先

校長:  

你地心中已經諗好自己想小朋友將來係點? 

你地就要諗下點先可以幫到佢地咁行?

Welcome to S.K.Y. Lovely Family

K1 班 ~ 適應週

小霸王一個月的暑假正式在16/8 完結左啦!!

新學校為左 K1小朋友可以適應下環境及家長可以了解多D 學校

所以 17/8 - 21/8 舉行『為期五日一小時上課的適應週』

仲要係必需有一位家長陪伴上課的

原本打算叫 6299 陪，但諗諗下又.....

K1 之後應該唔會再有機會陪上堂架啦?? 

K2 & K3 更加唔需要

咁咪即係"機會難得"?   最後都係.... 請足 5日上午陪囡上堂吧!!

適應週 - 上課流程

08:40 - 09:00

小朋友回來後到課室玩玩具

09:00 - 09:15

班主任帶領唱早安歌及一首兒歌

09:15 - 09:30

一起玩遊戲  / 一起做手工

09:30 - 10:00

小朋友被安排去洗手食餐點

家長就會去聽校長的分享

10:00

排隊接放學

DAY 1

一如上年的習俗，開學第一天一定會整呢個

『100分的早餐』

K1 全部攞到100分   我當然開心啦!

最主要希望佢可以『快快樂樂上學去』

繼續好好享受幼稚園的生活

由於係適應週   學校係任你選擇著唔著校服返學

第一天   我冇刻意同佢著

DAY 1 表現

四個形容 - 不受控制

佢一入課室就爆喊，跟住就喊下停下啦  (80%時間係喊囉)

佢唔係唔鍾意返學，只係佢想返舊幼稚園

始終呢到對佢黎講係新環境

DAY 2 

DAY 2 表現

比昨天好一點  (50%時間喊)

喊小左，喊得最勁都係同我分離時

上堂都算投入，對老師仲有小小陌生

依然同我講話返舊幼稚園

DAY 3

一早問佢想唔想著校服返學，佢居然要搵返套舊校服

我: 你唔洗搵啦! 唔會再有"NANA"架啦! (舊校服係黃色的)

小: 我要"NANA"呀! 

我: 冇呀! "NANA"俾左人啦! 你要著新架啦! 

小: ....... (無奈地接受)

小: 媽咪，你今日唔洗送我返學，爺爺送得架啦!

我: 點解呀? 好呀! 就算爺爺送你返都係返新學校架喎!

小: 吓，我要返XXX (舊學校名)

我: 冇架啦! 媽咪同左你講唔會再返XXX

小:....... (無奈地接受)

我都估佢今日返學會...... 好彩姨媽的WHATSAPP

姨媽:  Myolie，今日返學唔准喊架啦!

小: 返學唔喊

姨媽:   再喊就係 Stupid 架啦

小: No stupid ，姨媽先係Stupid  Stupid Stupid

姨媽:   你唔喊姨媽咪唔會話你 stupid 囉!

小: 唔喊

DAY 3 表現

多得姨媽的 stupid理論

佢今日冇乜點喊，仲勁投入上堂唱歌

到分離時佢先喊左一陣咋!  (20%時間喊)

班主任都讚佢有進步

呢日冇玩遊戲，一齊做小手工

<<羊咩咩耳筒>>

DAY 4

姨媽的 Stupid 激漲法   真係不錯! 

我發現小霸王原來大個女

佢"唔鍾意俾人睇小"'、佢"唔衰得"

所以... 佢唔要 stupid    (係好定唔好呢?  ^_^)

 ♥ 今日仲主動要求要著新波鞋返學 ♥ 

DAY 4 表現

終於有種.... 回復正常的感覺啦!

話晒佢唔係未返過學的小朋友

所以佢應該係比其他小朋友容易適應

估唔到要到第四日先 OK

唉.... 有我在身邊真係"嗲"好多

呢日同樣係一齊做小手工

<<甜甜小貓咪>>

DAY 5

返來啦~ 我的天真的小女孩

好開心適應週最後的一天佢係咁開心上學

終於係"快快樂樂上學去"

DAY 5 表現

完全係冇喊，一半功勞歸上面的小茶點

有得玩又有得食

仲要係樣樣都係佢心水

差不多到茶點時間，佢已經同我講一陣見啦!

總結: 

好開心學校提供呢五日適應週

雖然唔提供會好D (有我在身邊，佢會衰D)

但係令我更了解呢間學校，明白佢地教學的方針

希望小霸王會愛上它吧!!

Welcome to S.K.Y. Lovely Family

Date:   2015.08.17 ~ 08.21

MyBB試用小隊: SEA-BAND®防暈手帶

YEAH~ YEAH~ 又有好野試

今次有幸試的係

SEA-BAND®防暈手帶

雖然暑假完左，好自然街會出少左

但仲有週末&日嘛!   想出街一定搵到時間的

先介紹下呢條防暈手帶

●  不合藥物成份，無睡意及副作用

●  以穴位原理持續按手臂的內關穴   從而紓緩嘔吐、暈眩等不適症狀

●  數分鐘可產生效果，可重覆使用

●  適合坐長途車、搭船、搭飛機使用

●  大人小朋友都用得，更可幫助孕婦減緩孕吐不適

一盒有 2條手帶(左右手)，配上透過收納盒

左: 小朋友   右: 大人

小朋友手帶顏色靚 D、有花紋

質地好舒服、有彈性

戴上手唔會十分緊但都貼身的

大人款  相對比較簡單D 

由我家小試用員試帶

其實戴法應該反轉左，白色圓點應該向內的

但冇計，呢位小朋友唔多合作 ... 哈哈~

無論大人或小朋友款都好貼身

錯誤示範後，都要講返正確的

試後感:

呢排冇搭船/飛機   所以呢方面未試到

但搭車就有    因為每星期我都會帶小霸王返婆婆屋企

由自己屋企到婆婆屋企  都要轉車 (巴士 + 小巴)

向來坐車好易頭暈的我   戴左防暈手帶後

好似相對地.... 小左暈眩的感覺   (冇理由司機揸得好左卦)

哈哈~ 咁以後就唔怕暈車浪啦!

** 謝謝 My BB.COM **
** 以上產品由品牌提供 **
Welcome to S.K.Y. Lovely Family

K1 班 ~ 必需品準備篇

K1 新開始、新環境、新學校

咁當然所有用品都要買新架啦~ 

上年舊學校有得訂的防水LABEL，今年新學校居然冇

由於舊的有LOGO 唔用得，唯有去淘寶整

真係又平又正又多款你揀

左起: 

中号 (30x16mm 72張)、大号 (48x18mm 36張)、名字布贴 (小号30X20mm 60張)

三樣加埋都唔洗 HK$20

(我諗呢3年都唔洗再整，應該夠用)

名字布贴  

我都拜託公司姐姐幫我車上衫褲同毛巾仔上

新學校同樣為小朋友統一訂製左茶點用具

K1 放學波鞋

今年Adidas 睇唔出，轉左 Nike

一眼就睇中佢，係有點貴 HK$3XX

但鞋底硬度適中，個款又靚... 點可以唔買佢呢?  呵呵~ 

新書包 + 新生日會背包  (SPI 出品)

運動裝

之前都有講過，新學校今年開始取消左校服

每天都只係著運動裝返學咋!  

係咪好奇怪我點解  會將套校服同條錦鯉相放埋一齊?

梗係有原因啦! ~ 

我家小霸王愛魚魚大家都知架啦~

佢愛魚程度係去到....... 佢 D衫褲鞋..... 

衫.... 我見到有魚圖案會即買俾佢

褲鞋.... 梗係唔會啦

所以...... 佢係會為佢的衫褲鞋

改上魚魚的名字或近似動物的名字

佢已經有... Lobster、 Cockroach、黃立倉、紅衫魚.......

(得閒真係要為大家介紹下先)

講返套校服，小霸王為佢改左個名係"單頂"

講"單頂"，你地一定唔知

所以俾埋圖你地睇就會明... 

"單頂 " 係日本錦鯉的其中一種 

(真係多謝晒肥舅父，令小霸王認識多種錦鯉的名字)

♥♥ PS:   而家每天佢都會講"著單頂"返學 ♥♥

Welcome to S.K.Y. Lovely Family

♥ 屬於她的私人桌椅 ♥

前文提及已為小霸王準備了 ♥ 屬於她的書桌♥ 

但購買書桌時   我並沒有買埋桌椅 

你地見到的電腦桌椅 係爸B的

因為.... 我未諗到買咩桌椅??      我唔想又買多張電腦桌椅    太唔方便

好彩得到姨媽媽的建議   找到心水啦!!

就係佢啦~ 日本 Style Kids 兒童姿優墊

呢款兒童姿優墊    有兩種尺寸

分別係:

(S) 尺寸: 約 300 mm (闊) × 250 mm (深) × 230 mm (高)  => 適用身高 100 ~ 130cm

(L) 尺寸: 約 360 mm (闊) × 320 mm (深) × 280 mm (高)  => 適用身高 125 ~ 155cm

小霸王只係得9Xcm 高，所以一定係用S

顏色香港只得 粉紅或粉藍   (購自: 百老匯)

日本 Style Kids 兒童姿優墊

根據人體工學原理設計，從座面至靠背左右兩側緊貼身體，有助維持正確自然的坐姿。

呢張姿優墊  除左可以外加上桌椅用之外

其實佢本身都可以當一張小小椅子

"在日常生活中隨時隨地都可以使用"

♥ 你睇.... 食野時當小小椅子用都不錯架!!♥

就算睇書、玩玩具.... 我都會叫佢用

到佢用書桌時，我就會把姿優墊加上爸B 的電腦椅上俾佢用

咁咪唔洗再買多張書椅囉!! 係咪?

真心覺得

日本對兒童的成長真係睇得好重要

佢地出的產品雖然價錢唔平，但真係有保証囉  ♥

Style Kids: http://www.shlab.com.hk/zh/brands/style/style-kids.aspx

Welcome to S.K.Y. Lovely Family