大肚相

2012.07.28 (SAT)

今日一早終於收到相同相簿啦!!
因為5月尾影，而家生完先收到。
真係等得好苦呀!!

見到D 相就令我不期然諗返囡囡o係我個肚的感覺，
真係有點不捨得呀!!
興幸有影到呢輯相令我日後可以慢慢回味下...
哈哈...

公院 vs 私院

因為唔知自己忍痛程度有幾勁，
所以由計劃生bb o個刻起，
我就決定去私家生。

但有左之後，
見住d 私家醫生加價加得咁勁，
順產最少要5萬，
剖腹最少要7萬，
去得私院生就會儲埋臍帶血架啦!!
哇... 咁咪成1x 萬...
簡直係over 我budget 囉!!

最後....
唯有抱住一個好天真的心態，
就係... 要痛的話，
o係邊到生都會痛架啦!!
咁就決定去公院生....

決定左之後，
就冇得後悔...

幸好...原來比我預期的好好多，
不論是健康院產檢或是TMH，
我發現D 姑娘、醫生、阿姐都好好，
好友善，態度好好...
一D 都唔係網上寫得咁差囉!!

生完住院之後發現，
D 同胞真係好Q 衰，
麻煩 + 唔聽人講野，
仲要懶係勁咁... 　
"抱住阿B 瞓"
"換完片就咁放阿B o係床"
姑娘講N 次都唔肯聽，
真係... 令人討厭，
簡直係害人害己呀!!
係佢地令到我地d 香港醫護人員炆架咋!!

其實公院同私院都有唔同的好 & 唔好:

公院: - 價錢平 ($100晚)
- 可以自己親身照顧bb，一定要你學識餵奶換片
- 以時時刻刻睇到阿b
- 探病時間小 (其實一日有兩段時間，我都覺得夠)
- 冇乜時間真正休息
- 環境冇咁舒服

私院: - 可以休息 (唔洗下下自己睇住bb)
- 環境舒服
- 家人隨時陪你都得
- 價錢貴
- 唔可以時時刻刻睇到阿b

不過揀o係邊到生都冇所謂啦!
至梗要bb 健康咪得囉!!

懷孕的前後感受

識我的朋友一定知道我\從來都冇意思 / 唔多想生bb，
所以都唔知自己為乜要結婚架!!
拍一世拖唔係仲好咩??
之但係... 我知老公仔係好鍾意小朋友 (但唔鍾意照顧囉，只係玩 )

結左婚，老公仔一直都有問我幾時肯生，
我一定會答佢... "唔生唔得咩??"
佢就會反話我... "自私"
咁講真生仔真係唔係一件簡單的事，
唔係個人的事，唔係就咁生就可以...
我唔係自私... 唔係話俾藉口自己...

不過自從屋企的長老一個又一個咁離開，
我就發現生死真係好奇妙，
唔由得我地去控制，
如果他朝一日，我倆其中一個離開，咁餘下的.. 咪會好孤單囉!!
就係咁... 我就決定生bb

沒有刻意/ 強求要生龍b 的我，
估唔到... 咁快有左，
一知道有左，我的心情居然係好平靜wor，
沒有特別興奮高漲，
相反其他人比我更開心，
可能我所擔心的事將會... 一一浮現

有左之後，
發生左好多唔開心的事情，
如...
『親愛o既婆婆突然的離開』
『bb 出世後誰照顧』
『與老公仔/ 99/ 62 的不協調』
等等....

再加上...
懷孕真係好似考試咁，
每次的產檢就好似派成績咁...
幾多野係合格
是但一樣唔合格自己都會好唔開心，
希望下次可以追返或合格，
o個個壓力真係好大，
對於自己的不適/ 辛苦已經唔重要，
心中只但求bb 在肚中生長得好好/健康就可以!!

慶幸自己懷孕9個多月當中，
都沒有嚴重的不適，
嘔吐.. 作悶...沒有胃口 -- 我都沒有，
水腫... -- 輕微啦!!
體重... -- 頭尾都係重左9.5kg 咋!!
抽筋... -- 輕微啦!! (五次以下)

只係....
嚴重的腸胃痛、間中的肚瀉令我好辛苦，
因而令我要介食好多食物，
對我來講真係... 唔係問題囉!!
習慣晒..

到懷孕後期，
先開始緊張，怕bb 唔足月出世，
怕唔知有幾痛，
怕唔知係穿水/ 陣痛定係見紅...

不過真係唔到你諗咁多架!!
(但我心中都有同bb 講，我好笨架!! 不如見紅先，唔係我發現唔到)

我自己都估唔到自己可以撐得到 那10 級痛 ，
(幸好是5 hrs 咋... 唔係一定唔得)
o個種痛真係唔知用咩黎形容，
一種令人死去活來的痛，
簡直係"畢生難忘"

o個刻真係覺得媽咪真偉大，
痛完都可以再生...
而我... 痛一次就好啦!!

別人常跟我說: 唔好叫老公陪產
但我覺得呢個咁難忘的時刻有老公陪住同支持係好幸福的，
所以我冇刻意堅持，
但老公自己又願意 + 時間又match 到，
我都冇法... 係天意啦!!
(事後... 老公仔話... 唔驚!! 冇事我都放心d )

不過我都好多謝老公... 對我的鼓勵同支持，
雖然佢全程都係講" 加油呀!! 你得架!! 欠小小咋.. 努力呀!!"
不斷repeat & repeat，
o個刻覺得好煩架...
但之後諗返... 又唔係wor... ^ ^

整個懷孕過程，真係好感謝上天對我的好!!  

赤柱半天遊

2012.06.10 (SUN)

星期日，難得老公仔放假，
本身只係諗住出去元朗閒逛，
但老公仔就提議去赤柱，
唉... 佢想去，我又點會拒絕佢呢??

對於懷住八個月身孕的我，
咁熱天時去街真係有點兒辛苦，
幸好... 坐巴士都好快到，
唔算好遠...
咪當散下步影下相囉!!
(因為下個月就唔會再去咁遠架啦!!)

假日的赤柱真係好多人，
仲有人影婚紗相tim，
順住海旁行，好彩風大咋...
唔係實熱爆...

行左個幾鐘食埋野，
就出返尖咀行下海港城，
勁多自由行... 唉...
都係... 回家好...
點解香港咁多自由行架......??
俾個舒服d 的shopping area 我地得唔得呀???

《The avengers 復仇者聯盟》

2012.04.30 (Mon)
好耐都冇去戲院睇戲啦...
(幾耐就唔係好記得，但肯定有左之後就冇去過)
因為怕人多...
而且想睇的又不能睇...(怕有血腥鏡頭)

今晚如果唔係老公仔勁想睇avengers，
我都唔會去睇，
要我坐2個幾鐘 + 戴3D 眼鏡真係好辛苦囉!!

仿且... 呢D 英雄片，
我真係一個"英雄" 都唔識，
我開頭真係發緊夢多law...
幸好... 後來都開始明白... 都覺得套戲唔錯，
只可惜坐到個pat pat 勁痛，
幾經辛苦先可以撐到完場。

不過我肚裏面o個個好似聽得好興奮，
不斷撐下撐下...
(聽歌仔都冇咁high呀!!)

我相信佢將來一定可以取代我陪佢daddy 睇
(佢daddy 一定錫到佢燶!! )

讓座??

同事.. 屋企人.. 朋友...
每當同佢地出街或傾談時，
佢地都會奇怪地問...
"點解冇人讓座俾你"

我就會答佢地:
"點解佢地要讓座俾我呢?"

佢地又會反問:
"吓... 唔會卦, 你大肚wor?"

我又會答佢地:
"我每天坐西鐵返工, 明明企o係優先座前面,
不論是青年, 師奶, 男人... 等都會當睇我唔到,
咁我可以點呢?? "
"個牌都寫明..請讓座給有需要人仕, 佢地都唔讓,
難道我叫佢話佢咩??"
"人就係咁架啦!! 仿且.. 教育問題, 你冇計架? 係咪"
"你激氣都冇用, 羞恥係佢地, 又唔係我"

咁當然亦都有小部分的人係會肯讓座,
但真係好少囉, 十個都唔知有冇一個呢??

所以我都決定唔靠人讓,
平時返工早少少出門口,
坐回頭車到總站 (二個站姐) 一定有位坐返工,
實行"自己靠自己" ... 哈哈!!
雖然有點傻, 但總好過要企成大半個鐘。
希望可以撐多二個幾月放產假就very good 啦!!
一定得.....