年初三 ~ 赤口

已經係第五次去迪迪尼o既我，估唔到依然可以懷著興奮的心情。(童真嘛...)

記得對上o個次應該係上年的五月，距離一年都唔夠，但今次特別在... 小豆兒出咗世囉!! (上次小豆兒o係家姐肚子)

人地話赤口見面會鬧架，~我地咪抱住"鬧爆"的心情囉!! 哈哈!!

其實新年入迪迪尼只會多咗新年裝飾，好彩都加咗個新年小巡遊，感覺上會有新年氣氛d law....

↑好鍾意財神版的goofy，可惜冇得同佢影相... so bad!!

↑入得去... 點可以小咗佢地呀!! 係咪??　（為咗慶祝我地踏入拍拖七週年，未來老公仔佢先肯陪我入場玩，仲送咗張『新年版pluto+goofy合照』俾我呀!!! 勁開心架!!)

↑等咗好耐先影到的零零狗!! (姐夫話似狐狸多d!!!)

↑今次都係失敗咗.... 冇得帶佢地返屋企!!!

今次去迪迪尼係咁多次之中最多人+玩得最少野的一次，我諗八成半人係自由行+TOUR，正因為咁... 有D覺得自己唔係身處香港，佢地唔排隊+冇禮貌真係令人好討厭架!! 諗諗下... 上海迪迪尼可能玩唔過.....

『二十七』

『27』對我黎講，係一個好奇妙的號碼，點解?? 哈哈.. 因為

• 1月27日 - 拍拖週年日
• 9月27日 - 小豆兒生日
• 10月27日 - 拍第一輯婚妙相
• 11月27日 - 結婚大日子
• 未來老公仔27歲時向我求婚
• 我會o係27歲出嫁

踏入拍拖第七年，心情都特別緊張起來。我都怕『七年之癢』架嘛!! (所以咪諗辦法鎖住大家囉!! 哈哈!!)

↑↓拍拖週年日之花... 『鬱金香』雖然唔係我至愛，但開花時都好靚架wor!!

婚前最後一個拍拖週年日我地冇特別地去慶祝(冇法啦... 年初二要拜年嘛!!)，都唔會唔開心。熱鬧d 仲好啦!!

希望新的一年... 未來老公仔會更加愛我同錫我，最梗係收埋d脾氣呀佢!! 仲有出現更多『27』!!

大年初一...... 恭喜發財~

每年的年初一，媽咪就會一早好大聲地叫醒我地要起身同佢拜年，今年當然唔小得啦!! (做咗人地阿婆o既佢，依然中氣十足... 我諗我遺傳晒佢呢方面o既優點!!) 今年媽咪已經遲咗叫，改咗成十點幾先叫我地起身，哈哈!!

大年初一的第一個要去的地方就係...... 元朗祟正新村啦!! 去o個到係... 拜神~! (亦都係我地細細個成日去o既地方)

↑小時候我背後係好多好多龍眼樹，因為危險o既關係，已經冇晒囉!! 好可惜tim~

↑↓ 新一代『阿財與阿占』，勁攪笑!! 兩個都好乖...我諗係因為佢地係o係齋堂生活掛!! (阿財係由細住到大架... 阿占就係年幾前先住o係到) 兩個friend 過打band 呀!!

跟住呢.... 我地梗係要同劉家最大o既掌門人- 婆婆拜年啦!! 佢見到我地當然會笑得好開心啦!!! 話晒我地係大孫仔、孫女wor!! 不過~我地今年遇到個好勁的對手... o個個咪就係.. 小豆兒亦即係佢至愛o既曾外孫女... 點鬥呀??? 冇法啦!!

因為阿婆習慣咗早食飯，六點就要食晚餐囉，所以好早就返咗屋企休息啦!! yeah

姑姐婚宴

尋日我地一家人出席左堂姑姐的婚宴，向來我都唔太喜歡出席呢D 咁多親戚o既場合，但係今次老豆叫到.. 唔可以唔俾面啦!!!

↑好彩小豆兒都去... 唔係我可能唔去架!!

婚宴場地係『灣仔合和中心皇廷酒家』，可能個場係圓形，所以感覺比較闊同‘吉’咁，服務都係一般囉!! (死啦!! 我自己都係揀左呢個集團o既酒樓... 有d擔心tim!!! 唔好諗...)

↑祝姑姐同姑丈『百年好合、永結同心!!』
原來新人講致謝詞真係好touching架，好彩忍得住!!