Petite Princess ♥2017 Annual Performance♥

Petite Princess 每年暑假時間都會舉行大匯演

好讓學員多一個大型的演出經驗

雖然學左接近三年，但我一直都冇俾小霸王公主參與

一來之前年紀小，怕佢唔適應，二來同學仔唔玩，就冇玩

  

隨住小霸王公主今年升班，為左佢可以大膽D

今年就俾佢嘗試參與一下

由六月到八月，每星期二堂/三堂

小朋友要密集式排練，仲要有埋綵排, 總綵排.....

基本上，暑假的六日時間大部分用晒黎排練/綵排

幸好小霸王公主好開心地一一適應過來

原來同一大班小朋友一齊跳舞  對佢黎講係好開心的

兩個半月的排練後，話咁快就到八月中，正式舉行大匯演!!!

地點: 浸會大會堂

不過~ 越唔想發生的事，往往都會發生，就係.....

大匯演的前兩天，小霸王公主突然發燒，幸好只係微燒+冇其他唔舒服

睇左醫生+食藥後，發燒左兩天，

到大匯演當日，幸好燒已退，但體溫仍然比平時高

我都好矛盾應否俾佢表演，小霸王公主自己就堅決要參與，

見佢精神唔錯，就... 聽佢講一次吧!!~

最後，演出大成功!! YEAH!

病住都能夠投入地表演，媽咪我真係好感動+佩服!!

原來小朋友經過磨鍊後，真係會成長得更快! 更好的!

所以.... 下年有機會都會繼續俾佢參與

Good Show!!

2017 ♥ 我們●生日@Ocean Park ♥

唔~ 又一年

每年呢個時候真係唔係好想提醒自己 "你又老一年了" 

但冇計，時間就係唔等你，老一年又如何? 哈哈

Thanks My Sweet Heart  

(長氣地再提提你，要記住我的生日呀!)

一年一度的 Ocean Park 又黎，好彩呢日唔係得個熱字

間中都有下大雨令溫度都冇咁高，舒服好多

再加上.... 呢日居然係.... 冇乜人! 仲好玩好多!

一入場第一件事，就先去左玩夏水禮

因為呢個時間會係最少人，亦都係最乾淨

小霸王公主係可以一個獨霸泡泡池玩都夠，哈哈~ 

不過今年大個左反而仲細膽左，要Warm up 半個鐘之外，

玩一次就夠，冇再 encore? (真奇怪!)

玩完水，我地就去左兒童王國

完全冇人的旋轉木馬，負責的哥哥居然讓我地玩足五分鐘，

玩到.... 係我地要求夠啦~ 停啦! (哈哈~)

跟住小霸王公主仲勇敢地挑戰"兒童版跳樓機"，玩左兩次! 犀利! 

接近中午，我地就坐海洋列車過山上o個邊

見未到時間，就睇埋企鵝、海豹、雪狐

今次午餐都係揀返冰極餐廳 (早早BOOK定位)

可以好近距離睇住企鵝食野 (但係要注意係.... 勁凍，要帶定外套)

食過OP的多間餐廳，個人都係比較鍾意呢間

食物味道同服務唔錯，價錢合理

原價7XX, 生日有八折，就 $5XX

食飽飽，又繼續睇同玩

中華鱘館、熱帶雨林探險徑、北極之旅、海洋劇場、水母萬花筒、尋鯊探秘 ....

呢日只係玩到六點幾左右，我地就離開啦!!

多得港鐵，我地唔洗再迫城巴，不論去程/回程都只係一個鐘左右

真係好方便+車費仲要係平好多，正!!

明年再見吧!! Ocean Park!! 

回顧:
2016 ♥ 我們●生日@Ocean Park ♥
2015 ♥ 我們●生日@Ocean Park ♥
2014 ♥ 我們●生日@Ocean Park ♥
2013 ♥ 我們●生日
2012 ♥ 我們●生日

Little M 親子教室 ※ 阿茂整爆谷 ※

睇返自己紀錄先發現   有半年冇同小霸王公主整下野食啦!~

今次都係佢多次提醒下先記得  媽咪真係要開始對佢更加用心先得

今次整乜??  係小霸王公主係學校學左的.... 整爆谷

既然佢學左，所以今次就全權交晒俾佢整

由佢教返我地!!

材料:

爆谷玉米粒、牛油、鹽、蜜糖

做法: 

1. 放入牛油

2. 待牛油完全溶晒後，加入粟米粒，拌勻

3. 然後蓋上鑊蓋，用中火加熱，慢慢會聽到爆谷的爆跳聲

4. 當聽到爆跳聲停止後，離火。待會兒才打開鑊蓋

5. 做好的爆谷，可先灑點鹽 / 加入蜜糖 拌勻

就係咁簡單架咋! ~ 小朋友都可以親手自己做

你地都快D 試下啦!~

入學/面試相 @ Legendary

話咁快，下星期1/9開學日，我家小霸王就K3啦!~

雖然話就話仲有一年時間，但我已經有小小唔捨得

大得真係太快了，我的Baby Girl去左邊呀? (嗚嗚~ >...<)

由於本身幼稚園有幫佢影開學生相，所以一直我都冇刻意出外影的打算

直至朋友介紹下+價錢抵，就預約影下

$200 

包三個造型 +所有數碼檔+25張1.5x2"相

未影已經覺得抵，影完後覺得勁抵囉

先比較下價錢: 

快x美:  $75/6張

其他: $300-$500不等，仲要包1個造型

Legendary: $200 包三個造型

你話係咪抵啦?

時間: 

快x美: 5-10分鐘

其他: 1小時內

Legendary:  2小時呀!~ 

再講埋質素:

其他: 出面質素好與壞就真係一半半

Legendary: 我個人好滿意，因攝影師叔叔好用心+有耐性地拍攝

其實小霸王公主對鏡頭係好..... 敏感

佢會刻意唔望/ 避開鏡頭，所以係唔容易影的小朋友

但攝影師叔叔都能夠 KO 到佢，我真係好開心!! 哈哈~ 

以下係我個人好鍾意的攪笑及自然相片

(仲有好多張我都好滿意)

而呢三張就係攝影師叔叔的正式作品

你話係咪用黎面試?? 我答你: 有用當然會啦，咁靚，但我唔希望要用到囉!! (哈哈)

不過就算唔係面試，我覺得留一個回憶俾自己都唔錯

一個成長的印證  

K3係小朋友一個轉換點

Baby Girl 變成小女孩

有興趣就快D BOOK 黎影，因我知好多媽媽Group 已經搶住BOOK

完全唔係Hard sell 你，係真心分享!! 

Legendary Production: https://www.facebook.com/LegendaryPho/?fref=ts

她♥愛上了"森林家族"♥

早前提過為左獎勵小霸王公主K2的努力，就送上佢人生第一個森林家族玩具

點知.... 原來開左個頭真係冇得返轉頭的，只會.... 想擁有更多

其實唔只係小霸王公主鍾意，小FAN 我自己都好鍾意

因為森林家族D公仔、屋仔真係好得意

想買森林家族.....香港真係好貴，要等佢地做PRO 先會諗

但係... 日本呢... 就真係.... 平好多呀!~

以下呢張"魔鬼相片"係姨媽媽七月中去名古屋時影俾我架

仲要五日影足四日咁多，係處處都能見到

30% OFF ~ 30% OFF~  30% OFF~ 30% OFF ~

救命呀~ 你話.... 點可以唔心動呢????  ♥ ♥ ♥ 

姨媽媽講明屋仔就真係.... 無能為力啦! 細件的就可以!

所以我就入手公仔啦!!

登~登~登~登~

芝娃娃家族 (HK$260)

玩具貴婦狗家族 (HK$260)

攜帶小盒系列﹣BB與滑梯 (HK$65)

攜帶小盒系列﹣BB與蹺蹺板 (HK$65)

攜帶小盒系列﹣BB與鞦韆  (HK$65)

森林家族海邊遊玩設施套裝 (HK$199)

總數: HK$914 (呢個o係香港買的總價錢)

但係我.... 最後埋單的是...... 

HK$390

唔係眼花呀!~ 

"森林家族海邊遊玩設施套裝" - 

呢個係姨媽用500Yen 係legoland 出面間鋪頭抽中的，所以我唔洗出錢

其他呢? 全部購自BIG CAMERA的玩具部

香港價HK$715, 我卻可以以接近半價價錢買到，

係咪好好好......... 抵呢?

小霸王公主一次過收到咁多森林家族

佢梗係勁開心啦! ~ (好彩慳咁多咋，我荷包都冇咁肉痛)

真係唔敢想像自己去日本時會唔會..... 冇得走.... 哈哈~

▌台中遊 ▌ ● Day 4

DAY 4 行程:  

富王大飯店 →   鹿港老街  →  鹿港天后宮

鹿港玻璃博物館 → 台灣桃園機場 → 香港機場 → 屋企

話咁快就黎到台中遊的最後一天啦!~
出發前都知道呢一日會係好FREE，冇行程
但由於Day 1 飛機Delay左，所以行程就放左係DAY 4下午啦

DAY 4 上午係自由活動時間，
我地先去食返個早餐(酒店內)，再去對面商場行下

大大間的家樂福，對小霸王公主黎講就最開心

行到11點左右，就外賣小小食物返酒店慢慢享用

休息到12點幾，就CHECK OUT 出發囉!

第一個&第二個景點 ~ 鹿港老街  &  鹿港天后宮

特式食品比較多，夜市的食物都會有
但我地只係買左當地的鳳梨食，
超平、超甜、冇"揸"

第三個景點 ~ 鹿港玻璃博物館

玻璃欣賞下好了，我真係好怕小霸王公主唔小心打破....
所以....

景點就係咁多啦~ 下午三點幾就要出發去機場
冇錯~ 因為要去台灣桃園機場 唔係台中走.....
由台中去台灣桃園機場  大約三個幾鐘... (會塞車就早D)
所以.... 呢個車程真係長得好辛苦下
好彩中間有休息站買下野食、去下廁所

食下、瞓下..... 就到左台灣桃園機場啦! (天已黑晒)
原以為今次唔係坐EVA + Terminal 1，應該就... 唔會有機會見到佢
點知.... 係我太天真吧~  我低估左Kitty 的威力+受歡迎程度
 完全估唔到今次的閘口隔離都會有

同上次一樣，用剩的台幣.... 又係... 俾公主洗埋! 哈哈~
買埋Kitty 後，就要跟台灣Say BYe ByE 囉!

估唔到去程Delay，回程都Delay
好彩都係Delay 頭尾半個鐘左右
返到香港已經係12點幾啦! 真係好好好累!!

半年內去二次台灣真係..... (唔再去住啦! 我想去日本呀)
今次跟團旅行對小霸王公主都叫做係一個新體驗
雖然行程景點唔太適合佢，但讓佢明白旅遊唔係一定玩，參觀下當地名勝都不錯
哈哈~ 之不過呢個小女孩已經講定話唔想再跟團啦!
佢覺得坐旅遊巴睇唔到周圍景色，佢比較鍾意坐公車/捷運
都係..... 我都愛自由行多D

台中遊記到此啦!~ 期待再分享我地下個旅程吧!!


♥ 有時間/有興趣/唔想睇文字的話，可以睇片架!! ♥

想睇下其他台北的遊記，請 Click 入  ▌台中遊 ▌ ● 全集 ~ ♥

▌台中遊 ▌ ● Day 3

DAY 3 行程:  

寶旺萊6號花園酒店 →   日月潭  →  文武廟

毛王爺之家 → 茶藝館 → 彩虹眷村 → 勤美誠品綠園道 → 富王大飯店

新一天又到，DAY 3 行程會以觀光為主，
對小霸王公主黎講，可以話係.... 冇野玩，哈哈~

例牌食個酒店早餐buffet + 收拾好行李，就CHECK OUT 出發!!

第一個景點 ~ 日月潭

黎呢到個團就梗係包啦!! 

但坐船就係自費的，大小同價各TWD600

跟團... 只可以速遊 日月潭

聽導遊講，係有幾個碼頭可以上落參觀的

但我地時間不多再加上天氣... (一陣會落雨)

所以我地只選擇停留"玄光碼頭"，參觀一下玄光寺

雖然係速遊，但都能夠感受到日月潭有幾大、有幾靚

有機會再黎慢遊吧!!~

我地的團餐(午餐)選擇係望住日月潭的"景聖樓"享用
食飽飽後，仲可以行過對面就到我地第二個景點 ~ 文武廟

說真的，台中真係好多廟，D 廟仲好大、好宏偉

真係... 值得參觀下! 

第三個同第四個景點... 毛王爺之家 、茶藝館
就冇影相，因為係.... 俾你買手信的
毛王爺之家 - 台灣高山野生赤靈芝、蜂王漿、鹿胎
茶藝館 - 綠茶粉
(我地.... 冇幫襯，哈哈!!)

第五個景點 ~ 彩虹眷村
唔講真係唔敢相信整條小村巷牆上的塗鴉全部係出自已經九十多歲的彩虹爺爺
有人會覺得好奇怪、有人會覺得好可愛、有人會覺得唔靚
大家欣賞角度當然有唔同啦! ~
冇乜畫畫天份的我就覺得彩虹爺爺好犀利、好有創意
能夠令平凡的舊村落帶出色彩，真係好好!!
希望彩虹爺爺繼續畫多D!!

黎到呢日最後的景點 ~ 勤美誠品綠園道
 即係行街啦!~ 但.... 冇乜心水!!
只係去左買導遊推介的"春水堂珍珠奶茶"咋

呢日6點幾左右就返酒店?? 晚餐??
哈哈~ 又係自費，基本上三晚晚餐只係包左一晚咁多姐
DAY 2 晚餐我地就係夜市+杯麵
而DAY 3 呢晚，我地就係酒店對面商場食
小霸王公主要求食烏冬 (udon super fans)，價錢平香港小小啦! 味道都OK!

食飽飽後，行左一陣我地就返酒店繼續休息!

♥ 有時間/有興趣/唔想睇文字的話，可以睇片吧♥

毛王爺之家: http://www.maowangye.com.tw/index.asp?AR=ABOUT

彩虹眷村: http://www.1949rainbow.com.tw/

想睇下其他台北的遊記，請 Click 入  ▌台中遊 ▌ ● 全集 ~ ♥

▌台中遊 ▌ ● Day 2

DAY 2 行程:  

清境龍莊日式會館 →   清境農場  →  小瑞士花園

埔里酒廠 → 中台禪寺 → 逢甲夜市 → 寶旺萊6號花園酒店

Morning Call.... Morning Call....(跟團必有的早晨電話)
向來去旅行最早起床的一定係我   所以 Morning Call 對我作用不大
我實會早過個電話  哈哈~

由於晚晚換酒店  所以打扮好仲要收拾埋行李之後
就去享用台式簡單早餐  再係會館周圍影下相

清境龍莊日式會館，可以話係三日中最有特式同周圍環境最靚的一間

雖然房間及餐飲比較簡單，但周圍環境卻令人覺得好舒服

大家都食飽飽  攪掂好晒行李  

Day 2 行程出發啦!~(呢日都好多景點)

第一個行程 ~ 清境農場

(小霸王唯一一個最鍾意同最期待的景點)

位於海拔1750公尺的清境農場
境色綠油油一片，再加上呢日天氣很好
藍天白雲+綠草如茵   真係令人好舒服
(不過~ 就有D 太曬囉!~)

呢日係平日，所以.... 冇得睇綿羊秀 (表演內容包含羊咩咩脫毛秀、牧羊犬趕羊秀)

有D失望!! 但好彩.... 

羊咩咩自己周圍走，到處都能夠見到羊咩咩

第一次咁近距離接觸羊咩咩，開頭都有D 驚

但係羊咩咩完全係唔會怕人，仲好鬼熱情 (為左你手上的食物)

除左可以親親羊咩咩，大人同小朋友都可以騎馬馬
原本諗住小霸王公主會Say no 唔玩，點知... 又估佢唔到喎!! (叻叻豬)



係青青的草原逗留左1.5小時後，我地就去隔離的第二個景點 ~ 小瑞士花園
地方唔大，全露天，好多膠風車同花花草草
環境都幾靚，小朋友仲可以餵下鴨仔同鵝仔

食個中午團餐後，第三個景點 ~ 埔里酒廠

雖然對酒完全一知半解，但作為觀光了解下當地文化都是不錯的!

第四個景點 ~ 中台禪寺
聽個名可能以為係寺廟，但其實係一個博物館
內外都裝飾得很宏偉，好金光閃閃
可以讓大家了解多些佛法的一個不錯的地方

呢日最後一個景點 ~ 逢甲夜市

對台灣的夜市，我就不是太大興趣，多數都係飲下珍珠奶茶食小小咁架咋!
好彩最左食之外，仲有最多的.... 一定係夾公仔
幸運的話.... 好易就夾到，就算唔幸運，只要你消費到佢設定的金額，
最後你係可以無限次夾到你要的公仔為止
所以.... 都叫抵夾!! 抵玩!!

Day 2 的行程真係好豐富，尚算不錯! 

起碼有小霸王公主鍾意的行程!! 哈哈~ 

♥ 有時間/有興趣/唔想睇文字的話，可以睇片架!! ♥

清境農場 / 小瑞士花園: http://www.cingjing.gov.tw/
埔里酒廠: http://event.ttl-eshop.com.tw/pl/
中台禪寺: https://www.ctworld.org.tw/index.htm

想睇下其他台北的遊記，請 Click 入  ▌台中遊 ▌ ● 全集 ~ ♥

▌台中遊 ▌ ● Day 1

DAY 1 行程:  

屋企 → 香港機場 → 臺中清泉崗機場 → 清境龍莊日式會館 

由於今次只係去四日 (實則係3日半) 再加上係夏天，行李上就可以簡便D
之但係.... 去得台灣就預左買手信，本身諗住帶兩個大，點知....
小霸王公主提出要自己帶一個喼，所以最後順佢意俾佢帶個細喼
三個人一大一細喼

前提講過我地今次係跟團，出發同返黎時間都唔係我地可以控制
..................
今次去台中起飛時間係15:15，12:30 要到機場報到
我地可以輕輕鬆鬆 11:00先慢慢出門口

準時12:30報到同寄行李後，就去左何洪記食個午餐先
哇!! D 撈麵真係好正好爽口
1:30 再集合一齊講下有咩程序咁.... 就各自入閘過關

順利過關後，見仲有大把時間  我地就周圍閒逛下

仲俾小霸王公主發現有雪糕食，幾咁開心!!

估唔到  就到登機前  天色突變，下大雨仲雷暴

攪到好多班機都要延遲，我地都唔例外。

先是延遲登機時間半小時，諗住安全上到機就可以起飛

點知再黎延遲一小時起飛

頭頭尾尾延遲左大約兩小時先出發到

原本係15:15 起飛，最終 17:05

@人生第一次 Delay 咁耐@

好彩小霸王公主  都肯乖乖地自己玩下，睇下Video，仲等到瞓埋咋
唔係.... 真係.....

由大風大雨開始等到太陽伯伯都出返黎準備收工時

我地終於順利地出發!!!

雨過天晴後，幸運的我地仲見到彩虹呀! 好靚呀!!

個多小時的機程話咁快就到，差不多到達台中上空時太陽伯伯都收工囉!

到達臺中清泉崗機場，辨理入境、取回行李、換埋台幣後，已經係七點幾啦!!

小霸王公主冇食飛機餐，唯有係餐廳外賣一份腿旦治俾佢吧!!

坐上旅遊巴  出發去我地呢日第一個亦都係唯一一個的行程 - 清境龍莊日式會館

冇錯!! 係返酒店呀! 由清泉崗機場去酒店都要差不多兩小時車程

真係疲累、很疲累! 

九點半左右到達酒店啦!!
食返個 Late dinner 我地就各自上房休息啦!!~
估唔到冇行程的Day 1 都可以咁累~ 辛苦晒!

♥ 有時間/有興趣/唔想睇文字的話，可以睇一片♥

想睇下其他台北的遊記，請 Click 入  ▌台中遊 ▌ ● 全集 ~ ♥