My Cooking Diary - 韓式料理

2012.03.25 (SUN)自從結左婚後，
我都好小機會下廚啦!!
原因... (老公仔就話係藉口)
多數係99 煮囉 +
佢唔多鍾意人地攪個廚房，
再加上...佢地鍾意食中餐多D，
而我向來唔多鍾意食飯...
所以....

老公仔成日都叫我煮野佢食，
你估我唔想咩，衰佬!!

尋晚，難得99 出外不在家，
我就可以獻醜一下，
今次揀左自己好想試好耐的
『韓式料理』

前菜 - 酸辣青瓜
主菜 - 雞柳炒年糕 (辣醬)
配菜 - 泡菜餃子
湯 - 豆腐魚蛋麵豉湯
甜品 - 士多啤梨
睇就好似好好味...
但每樣都唔係我預期囉!! 激氣..
青瓜 - 唔夠酸同辣...反而係甜... 失敗
年糕 - 太辣, 但老公仔就話OK...半失敗
餃子 - 買的，只係煎返熱...
麵豉湯 - 叫做最似樣，尚算合格!!
我諗..
我真係要好好練習一下，
下次再努力吧!!
(不過唔知幾時再有機會下廚囉!!)

1st Shopping for BB

2012.03.25 (Sun)
老公仔終於肯開始陪我買野俾BB 啦!!

我都唔知係早定遲，
不過相信比起其他媽咪，
我算係懶同慢D o個隻架啦!!
人地已經買晒好多野，
但我先由頭開始咋.... 條路好慢長咁...

原本諗住首要係買BB 床，
但係睇左耐都唔知買木床定係網床好，
諗唔通的我...
最後都係... 俾老公仔話諗清楚先買
(心諗... 佢決定唔得架咩...)
唉... 各有各好處... 點揀好呀???

買唔到BB 床就唯有買住D
有特價而我又一早決定好買邊個牌子的東西。
最後....
就買左CHUCHU 奶樽 X 8 個

TOMME 奶樽消毒器

大象牌暖水壺 及水煲

贈品

真係唔可以睇小，
買咁少都用左接近$2000，
好彩唔係我俾咋... 哈哈...
老公仔話大D 先同BB 計... 真係俾佢激死!!

21W1D

2012.03.19 (MON) - 21W1D

難得老公仔可以平日休息，,
所以就BOOK左尖咀 - 王培儀醫生照結構。

我上網見好多媽咪16W 已經照晒，
所以我都唔知自己遲唔遲架??
但沒關係啦....

約左1.30，我地1:15 就到，
做埋登記 -> 驗小便-> 驗血壓 -> 磅重，
再等多個幾字，話咁快就到我囉!!

王醫生好細心咁分析及講解每部位的情況，
由頭仔... 身體 ... 各器官... 手仔...腳仔....
到性別....
醫生告訴我BB 一切正常，
仲好肯定的告訴我BB 的性別... 哈哈...
仲話一定冇錯架啦!!
照完，放心晒!!

BB而家已經0.9LBS 啦..
好開心見到佢每天在長大，
終於慢慢開始感受到佢的存在。
亦非常期待佢的第一踢!!

之後，冇乜好去處，
我地就坐船去中環再轉巴士去左山頂，
諗住平日唔多人，
點知勁多同胞囉!!
攪到好迫...
你知佢地幾有"禮貌"架啦!!
影相唔會理人感受、唔排隊.... 數之不盡....

玩到5點幾坐返巴士去中環又坐船去尖咀搵野食，
因為我勁想食石鍋飯，
所以老公仔... 就同我去咗.. 金巴利道的"高麗軒"，
唔知係咪星期一的關係，冇乜人囉!!
(幾驚又去左黑店)
幸好... 都唔係太差姐... 哈哈...

放假一天，好似仲比返工辛苦呀!!

大掃除

因為差不多是時候要準備"買野"的關係，
所以老公仔一放假當然立刻要佢收拾下啦!!

辛苦3個多小時，
終於把客廳中的二分一雜物丟晒，
估唔到一個屋企三個人住會咁多垃圾 (唔計我)，
真係令人意外....

收拾完....
而家感覺空間多左好多，
相信都足夠放新的東西。
哈哈....
YEAH... 下星期可以開始SHOPPING 囉!!

PS:
62 一返到屋企見到D 野唔同晒，不斷講講講...
好煩呀!! 男人老狗... 最多垃圾係佢呀!!
仲話人好丟佢D 野... 唉... 事不關己....

別了.....

終於...要別了...

今天爸爸媽咪佢地會把婆婆(即係嫲嫲) 的骨灰帶回鄉下擺放，
我... 因為"唔方便"，所以冇得一齊返去。

轉眼間，
婆婆已離開我們3個月了，
但不捨之情依然存在，
感覺是...
她好似常在我們身邊一樣。

唉...
如果可以讓我再抱緊她一次多好，
就算是夢也好...
我好想跟她說聲
『我愛妳』
『多謝你』

妳永遠都係我心中最好的婆婆，
雖然好唔捨得好妳，但係...
而家妳可以同公公一齊周圍去玩，
去過新的生活，無憂無慮。
我又怎能不放手呢??

放心...
妳留下太多回憶俾我們，
當我們掛住妳時，
就可以一一回味!!

妳對我的叮囑，我會好好記住!!
我知道在另一個地方的妳，
一定會保佑我們的!!

謝謝妳，別掛心了!!
我們會永遠思念妳....

心情是.........

昨天我選擇了不回家食晚飯，
因為我真的不想去面對他們，
我知道逃避不了，
但只少讓我可以靜一下。

原本諗住一個人行下逛下，
累就坐下，
點知好友sandy 知道我唔開心，
佢又點會肯唔理我呢??

最終，佢陪我行下，
食個晚餐吐下彼此的苦水，
心情係好左d...

之但係... 回家時，
我咪又係要面對現實，
唉..... 真係唔知點去形容自己的感覺。

今日.... 心情依然... 一樣，
痛苦.... 無助....孤單...
救命呀!!

我知... 我知...
我係冇嬲老公仔，
但係... 我對住佢...
我真係唔想同佢講野，
或者係... 冇話好講，
點解??

我知道..
唔應該因為第三者(99) 影響我地之間的感情， (係唔可以)
但係..... 唔得囉!!
可能我對佢的期望太大，
一心諗住佢永遠都係站在我o個邊，
但事實唔係.....
原來佢會... 站在中間，
你叫我... 怎樣不怪佢呢???

發現自己擁有的，是要跟人分享的。
只是我一直沒發現。
真傻....
仲係傻得很天真....
花名：『天真fan』真的改得不錯。

我真的不知道往後應如何，
............................................
............................................
............................................

此刻不想多想了....

吵架

2012.03.13 (Tue)

今夜，同老公仔吵了一場大架，
冇諗過小小的事會吵得如此利害。
可能今次不只是兩個人，
而係有埋99 + 我媽媽....

我亦首次認真地說出一句
『咁我返大埔(娘家)住囉!』

十年來，吵過小架無數次，
但今次最嚴重，亦最傷害。
可能彼此真係忍得好辛苦，
一下子爆晒出黎。

我承認 ...
我心情真係唔多好，
我說話語氣好似重左，
我性格係固執兼硬頸。

但係...
一句話重複講左二次,
佢都係唔信 又多意見時，
第三次我已經選擇放棄... 是但，
點解仲要講呢??
教我如何去忍受....

我唔係小朋友呀... 99
我識分析.. 識自己照顧自己，
肚餓識煮野食、凍會識著衫....

自少，媽咪出外工作，
衣食住行都要自己理，
已經習慣左2x 年。

而家... 有人照顧你，唔好咩，
唔係唔好，係唔想同唔鍾意，
獨立 -> 依賴，唔得囉!!
你當我犯賤可以嗎?? 99

我信我阿媽的話，
係因為佢除左係我至愛之外，
佢.. 真係知晒我d 飲食習慣，
知我食乜會好d，食乜會唔好，
但點解係要唔信呢?? 99
係咪要我當住你面前
肚子痛... 胃痛.. 肚瀉...
你先相信呢??

我可以點做呀??

一個不愉快的記憶

2012.03.11 (Sun)

今日係農曆二月十九觀音誕的大日子，
因為唔係次次都撞正係放假，
難得今日老公仔同我都不用上班，
梗係要跟媽咪去拜神食下齋啦!!

不過天氣就唔係咁好，
又凍又落雨... 真係勁討厭呀!!

你知架啦..
一落雨老公仔就勁炆，
再加上我又是個大東瓜，
所以... 事事都要特別小心，
唔係一定俾人鬧爆!!

拜完神食完齋已經差不多二點幾，
大家就各自散band。

點知... 出路口等車時，
唔知點解等左好耐都冇車，
姑丈提議行出去元朗，
我呢個大東瓜又點肯呢....
我話我寧願等車囉!!

唉... 就係咁... 不幸的事就發生左，
一隻年老的唐狗，可能不記得怎樣回家，
不斷地在馬路上走來走去找回家的路，
每當有車子行過，
我地都已經盡力叫牠回來，
點知... 我諗呢d 叫做命運吧!!

一輛行得好快的小巴，
唔殺制之下，撞向牠不得至，
仲look 過牠身軀，
牠發出陣陣哀鳴，起身咬了一位小姐的小腿一下，
就死了.....

當時的我，有預感小巴會不停車，
所以牠未出事時，我已背向著，
但撞擊的聲音，一一傳到我耳內，
我立刻好激動地喊起來，
手、腳、身體不自主地震動著，
我真係好難過，好傷心。
怎可以這麼殘忍呢??
難道... 牠就沒有生存的資格??

我都不知哭了多久，
只知老公仔緊緊的抱著我。

當時大家趕快找車送我離開現場，
幸好，剛剛有的士... 我可以立刻離開。

離開後，心情亦平復下來。
沒想到會發生咁o既事，
而老公仔亦報警及協助那個不幸的小姐，
送往醫院打針，我相信她亦嚇壞了。

事後，我也在想，件事是誰錯??
每個人都有佢的不同答案，
而固執的人... 當然是... 小巴司機啦!!

你問我而家仲驚唔驚??
我會答你... 驚架!! 有陰影架!!
但為了不讓大家擔心，
我只好扮作冇事，
不過我相信時間可以令我.. 淡忘的!!

有冇咁靈呀??

成日都發夢o既我 (唔係白日夢),
真係唔多信會成真,
因為d 夢多數係勁無聊的,
有時醒左都未必記得呀!! 咁多...
一晚幾個都試過

點知...
今朝差不多天光發左個無聊夢,
夢中我係等緊車返工,
點知同行的阿哥及妹妹話我知,
d bus 壞晒, 有排都冇車wor
但唔知點解我地都係繼續o係站到等,
(真係勁白痴)
我記得係等左個幾鐘都仲等緊,
阿妹就不斷話我... 最衰係我...
衰乜就唔係好記得

咁就醒左...

噢... 真係唔知醒... 大獲!
瞓過龍... 今日仲要開例會,
即刻起身換衫啦...
幸好... 趕得切...

雖然就算係遲到, 老闆都唔會話,
但我向來唔鍾意遲到的,
所以... 都係... 唔好啦!!

唉... 可唔可以小發d 咁o既白痴夢呀!!
攪到今日精神唔多好,
好眼瞓呀!!

太久冇見了...

睇返自己個blog ,
先發現對上一次更新又係三月,
係一年前的三月,
真係好奇怪!!

難道... .每年呢個時候我先想寫野,
唔係嘛!!
我相信係我個人比較懶,
所以先係咁姐。

不過為左以後唔想唔記得發生左咩事,
我決心要寫返blog,
打字姐... 好過用手寫嘛!!
係... 我知道用FB 係方便好多,
但FB 太開放, 冇秘密呀...
亦都不能將我心中所想表達晒出黎,
我唔想後悔呀!!

因為上年其實都發生左好多開心同唔開心的事,
但就係因為我懶, 冇寫低... 而家..
開始擔心好快會忘記,
年紀大... 記性真係差好遠