笑笑小語錄 @ 39 個月

笑笑小語錄: 

【攪笑事例  (一)】
話說之前參加 Sandy 姨姨的註冊儀式，好奇的小霸王每事問，真係好好笑...

小:  媽咪，Sandy 姨姨係到做乜野? (準備開始律師見証)
我:  Sandy 姨姨，準備註冊結婚囉! 所以我地唔准出聲呀!
小:  吓? 點解呀? 唔得咁架!
我:  she...唔好咁大聲，我地要細細聲先得
小:  Sandy 姨姨，係到做緊乜呀? 佢地做緊乜呀? (讀緊"我願意"... 點解釋你聽好呀?)
我:  she... 結婚囉! yeah! 我地拍手手先!
小:  yeah! yeah! (佢勁開心地拍手)

小:  Sandy 姨姨，又係到做緊乜呀? (準備交換戒指)
我:  戴戒指囉! 
小:  媽咪，咁沂沂隻戒指呢?
我:  .......
小:  沂沂冇戒指戴喎!
我:  唔! 一陣媽咪同你去買，好唔好?
小:  好! 

** Sandy 姨姨的註冊儀式原本就只有感動的一刻，多得小霸王場面變得更開心、更攪笑，好彩佢地冇錫錫，唔係我都唔知點解答佢好? 哈哈~ **

 【甜心事例  (一)】
某天晚上，食飽飯我就入房換床單，小霸王又跟埋入黎 (佢話幫手喎!)，見佢咁積極我梗係樂意俾佢一齊做啦! ~ 點知做完之後.....

我:  BB，唔該晒你!  你可以出去玩玩具
小:  ...... 媽咪，你收埋好多玩具架!
我:  ...... BB，你又知我收埋左好多玩具o既?
小:  係，媽咪你收埋好多玩具

在廳的爸B 聽到對話，佢又加入
爸:  係呀! 媽咪真係收埋好多玩具係衣櫃架!  你入去搵下!
小:  衣櫃都冇!
爸:  有呀! 你搵清楚!
小:  冇呢! 衣櫃都冇!

我:  係! 媽咪真係有禮物，你想唔想要?
小:  要呀!
我:  咁你而家Clean up 好晒你玩完未收拾的玩具先啦!
小:  哦!  (九秒九地左收拾右收拾，好快就完成)

入到房俾佢係衣櫃中搵到佢想要的禮物，本來諗住遲小小先送俾佢

我:  BB，收到禮物要講乜架?
小:  Thank you 媽咪
我:  仲有爸B 呢?
小:  Thank you 爸b

** 有左呢個小測試，相信我地可以實行"獎勵計劃"，諗下有乜要佢做先? 要佢改先?

【攪笑事例  (二)】

有晚，我陪小霸王做完功課，就獎勵下佢可以貼下貼紙 (我就繼續簽手冊)，點知...一擰轉頭就見佢.....

我:  BB，你係到做乜呀?

小:  我係到"痴"鬍鬚囉!

我:  吓! 仲乜"痴"鬍鬚?

小:  我想要鬍鬚嘛!

*** o個刻真係笑四我! 要鬍鬚黎做乜呢? 你大個就會明白 ***

【攪笑事例  (三)】

某日下午，小霸王見到公公去飯枱上攞粟米食，跟住佢又邊行邊講咁去攞粟米食...

小:  E... 我又食粟米先 (細聲得黎足夠讓我知道)

我:  哦! 你咪食囉!  你就咁食呀?

小:  係呀! 粟米梗係咁咬黎食啦! 

我:  你呢排唔係唔多鍾意食粟米架咩?

小:  唔係呀! 

我:  咁你唔係 met 粒粒食?

小:  粟米要咁咬住黎食架!

我:  ...... 哦! 你鍾意啦!

佢食粟米o個樣真係好cutie ，忍唔住要影低佢  (戀囡狂... 就算佢乜樣都覺得好cutie ♥_♥)

小:  吓! 人地食粟米個樣都好影o既?

我:  咁你食粟米時個樣好得意嘛!

小:  吓?..... 影一張夠啦! 唔好再影啦!

我:  一張咁少，俾我影多幾張先啦!

小:  影人食粟米，你咁攪笑o既!

我:  ..................

*** 吓! 影張相都要 approve?? 唔係嘛! 做人媽咪真唔容易呀!~♥ ***

　

【硬頸事例  (一)】

由 BB 仔開始，小霸王已經唔鍾意剪頭髮，髮型師無論係男定係女，佢都一一拒絕 (用爆喊黎嚇退人，係! 佢次次都成功)   冇計! 咪唯有由我黎剪啦!  近呢幾次幫佢剪，佢都已經開始拒絕，但我堅持唔得，佢都肯俾我剪。點知最近呢次.... 軟硬兼施都唔得，最後選擇順佢意...

小:  媽咪，我唔剪頭髮呀! 

我:  唔得呀! 前面D頭髮太長"吉"眼睛

以下係佢唔受控制下..... + 爆喊下的說話

小:  我都話唔剪頭髮囉!  

小:  都話唔剪頭髮囉!  剪頭髮唔o岩架!

小:  我唔想剪頭髮呀!

小:  唔准剪頭髮呀

多次嘗試... 多日嘗試.... 多星期嘗試.... 最後....

我:  你真係唔剪頭髮?

小:  係! 我唔剪頭髮

我:  你要留長頭髮?

小:  係呀! 

我:   唉!! 咁好吧! 

*** 相信 ♥ 可愛的齊陰冬菇頭 ♥ 短期內都唔會出現架啦!~ (掛住的話... 只好睇相吧)  冇左齊陰頭，感覺上多左少女味道，小左bb樣.... 有誰可以話我知，佢幾時先俾人剪頭髮呢? ***

【甜心事例  (二)】

向來只會對住我先會嘴甜的小霸王，而家大左，識多左.... 嘴甜對象開始多左... 家中三位佢的小粉絲 (6299+爸B) 早已俾佢冧到暈左，估唔到.... 一向對佢都好嚴肅的婆婆..... 都..... 唉! 真係唔夠佢玩...♥

婆:  乖孫，婆婆個新髮型靚唔靚呀?

小:  靚呀! 好靚呀!

婆:  咁婆婆靚唔靚呀?

小:  靚

婆:  咁婆婆靚D定公公靚D?

小:  婆婆囉!

婆:  咁媽咪似婆婆定公公?

小:  媽咪似婆婆囉!

** 你話係咪好甜呢?  俾我都冧四啦!  ♥ ***

Welcome to S.K.Y. Lovely Family