笑笑小語錄 @ 37 個月

笑笑小語錄: 

【甜心事例  (一)】 

有日夜晚準備一齊瞓覺時，我見小霸王唔多開心咁，咁就同佢傾下計....

我: 你係咪唔開心呀? 無論開心定唔開心你都可以同媽咪分享
小:  .......
我: 唔緊要架喎! 你講俾媽咪知啦!
小: .......
我: 咁不如媽咪同你講先啦! 我今日好唔開心呀!
小: 媽咪，點解你唔開心呀?
我: 因為我一返到公司就俾老細鬧呀!
小: 你俾邊個鬧呀?
我: 俾老細鬧囉!
小: 係邊到鬧你呀?
我: 係公司囉! 所以媽咪好唔開心呀! 
小: 媽咪，no sad, happy (雙手輕撫我的臉)
我: Thanks bb

♥ o個刻我真係好窩心，因為冇諗過小霸王可以做自己的傾訴對象 ♥ 原本諗住開解佢，卻變成佢開解我 ♥ 

【甜心事例 (二)】

有一晚如常陪佢睇書書，揭到講月份的那一頁，我依然係會話佢知，一年係有十二個月，一月係 January、二月係Feb...... 點知當我讀到七月，佢居然識讀 July、August.... 哇! 真係嚇我一跳，冇諗過佢會記得，竟然佢記得咁我就話佢知邊個月份有邊個生日..... 點知第二晚佢...

小: 媽咪，一月點讀呀?

我: January 

小: 咁邊個生日呀? 

我: 冇呀! 咁你記唔記得你邊個月生日

小:  .....  邊個月呀?

我: 哦! 唔記得... 係 July 呀!

小: July 囉! 媽咪係 August 嘛!

我: O.. u remember it, Thanks BB

♥ 只係講左一次，就記在心中，真係我的甜心公主。但好攪笑係.... 我明明話佢知 " 我同爸B生日都係August"架? 點解佢只記得我呢? 生女真好... 哈哈~ ♥ 

【甜心事例 (三)】

呢日唔記得同小霸王講開乜野.....

我:  你記唔記得爸B 電話?
小:  記得
我:  咁幾多號?
小:  94XX XXX1嘛!
我:  吓? 真係記得喎! 叻叻! 咁媽咪呢?
小:  唔記得
我:  64XX XXXX 
小:  都係唔記得

♥   爸B 知道囡囡記得佢電話號碼不知幾咁甜呀!  我仲叫小霸王自己試下打俾爸B，又真係打到喎!~ ♥

【攪笑事例 (一)】

如果夜晚得閒的話，我都會同小霸王講故事 ，除左講故事，近排多左個... 角色扮演(上課)，即係我做老師，佢做學生

我: 好啦! 各位同學要返埋位啦!! 
(小霸王就會幫手放好佢的同學仔同埋攞一本佢想講的書)
我: Good morning children
小: Good morning mommy ♥
我: 好啦!~ 我而家點名，小朋友要舉手講到
(小霸王就會續一扮演及配上聲音)
...............................................

以下係佢的朋友仔... (越來越多...)
左起: Piggy、BaaBaa、Myolie、Snoopy、Nemo1、Nemo2、Moon、Star、NeighNeigh

【攪笑事例 (二)】

由於小霸王開左學，佢每朝早返學前 / 夜晚瞓覺前我都會幫佢搽油係腳板底 (咩油遲D再詳講)，但搽之前佢都會問我搽咩....

小:  媽咪，搽咩油油呀? 係咪Lemon?

我:  唔係，lemon係返學前搽的，夜晚瞓覺我地搽另一隻?

小:  搽咩呀?

我:  我話.... 唔! 草草油!

小:  我都唔食草? 唔洗搽草草油啦!

我:  佢係薰衣草油，咁你當花花油吧!

小:  哦! 

♥  真係笑四我! 我知佢唔食草? 咁我諗住草草油易記過薰衣草油嘛! 下次都係講返全名吧 ♥ 

【攪笑事例 (三)】

話說有晚我諗住用雞蛋銀戒指幫小霸王碌碌去下風去下火，向來佢都唔鍾意架啦! 預左佢會爆喊+唔鍾意，點知..... 爆喊之餘仲爆笑.....

小:  我都話唔碌雞蛋囉! (喊住講)

我:  碌下D風呀! 等你舒服D嘛!

小:  我都唔鍾意碌雞蛋O既!

我:  係啦我知你唔鍾意，但係好快碌完架啦!!

小:  唔碌雞蛋呀! 雞蛋唔係碌架係用黎食架! 所以我唔碌雞蛋呀!

我:  ........ (呆咗一陣)  係囉! 我都知雞蛋係O食既!~

♥ 真係唔知話佢叻定係醒好.... 哈哈~♥

**************************************************************************************************

說真的，過左  Trouble 2 後踏入 Terrible 3，小霸王係任何事情都好有個人主見，不論是穿衣の道、飲食方面、閱讀方面..... 都係佢自己揸主意，咁當然唔正確的我會堅持我的主見啦!  不過，同佢溝通時，佢的反應呀? 答覆呀? 呢d 就真係...... uncontrollable

爸: 你今日食咩茶點呀?

小: 唔記得左啦!  / 唔知喎! / 食左好多野喎! ....

爸: 你今日上堂唱咩歌歌呀?

小: 唱左好多歌歌囉! / 唔記得! / 早安歌囉! ...

爸: 爸b返黎你要講乜架?

小: 爸b

爸: 冇嗱?

小: welcome!

Welcome to S.K.Y. Lovely Family

♥ 沒事幹的週末 ♥

呢個週末.... 我地冇返婆婆屋企啦!~ 

點解?? 

咪就係逃不過"病菌"的威力囉!

開學都冇 2星期，佢就打敗仗啦!

但係今次我估主要係佢"要長高" (發骨節)的緣故

頭 3日體溫比平時高 (冇發燒)  - 正常上課

到第4、5日 輕微發燒  - 放假休息

到第 6、7日 冇發燒但咳咳咳  

頭幾日我都只係用EO 幫佢舒緩下

到佢真係發燒我就冇用啦!  帶佢睇下醫生好

我個人想用架! 但始終暫時未俾到信心家人

唔緊要! 我會努力研究 ♥

小朋友病就真係辛苦過自己病

見佢咳到好似個"阿婆"咁   都唔知好笑定好嬲

(醫生話佢冇事的，只係氣管敏感)

病左就梗係冇得出街啦~ 要在家休息 ♥ 陪瞓  ♥ 陪玩  ♥

玩得唔知玩乜好時   就陪佢玩下剪剪貼貼

 ♥ 當做幫佢練習下做勞作吧  ♥

唔知點解小朋友咁鍾意玩剪刀? 

大人睇見真係一剪一驚心    唯有牛咁眼望實啦~

不停提佢自己要望住、小心用剪刀..... 

踏入K1  真希望唔好咁多親子勞作

要做學校做吧~ 哈哈  ♥

Welcome to S.K.Y. Lovely Family

Date:   2015.09.06 (Sat) ~ 3y1m24d 
Place:  Home 

♥ 屬於她的水族館 ♥

小魚迷呀～　小魚迷～　

你身邊的人真係太太太太..... 愛你啦!  ♥ 

見到魚的東西一定會記得買俾你

(特別係... 勁錫佢的姨媽媽，去到邊都好似傻婆咁搵魚)

 ♥ 多謝晒~ 舅父舅母送上兩款

好得意+像真度好高的魚魚貼紙

呢位愛魚魚的小朋友不顧一切咁

貼呀~ 貼呀~ 貼呀~

左邊貼完   右邊又貼過

目的只有一個『貼晒佢為止』

話咁快   就 KO 晒兩張貼紙啦~

♥ 屬於她的水族館 ♥ 誕生

♥  佢簡直係大大大大滿足呀!~ ♥  

佢真係好開心架!~ ♥  

我心諗:   唔係嘛! 連沖涼都要對住你 D 魚?? 真係多得你唔小呀! 

佢望左D 魚好耐，跟住仲問我

小:   媽咪，點解冇錦鯉O既?  咁小魚魚O既?

我:   吓? 咁小?? 

小:  要叫舅父買錦鯉先得

我: 我唔叫架，要叫你自己叫呀

小:  哦!~ 下次我叫舅父買

唔好啦卦?   成廿幾三十條魚你都話小??

我每晚沖涼  已經好似俾廿幾三十對眼望住咁

尤其係O個條笑都見牙唔見眼的鯊魚    真係驚多過喜囉! ♥ 

囡囡呀~ 可唔可以改變下~ 鍾意狗仔呢? 

Welcome to S.K.Y. Lovely Family

※ 兒童閱讀計劃 2015 ※

之前我有提過 K1 新目標 

係想多帶小霸王去圖書館或者多借圖書俾佢睇

為左唔想自己善忘唔記得或者俾藉口自己冇做到

所以........

9月1 日開學日那天放工

我就即刻去圖書館幫小霸王申請圖書証

仲有參加埋"兒童閱讀計劃 2015"

呢個兒童閱讀計劃的目的

引發兒童及青少年對閱讀的興趣，培養他們養成良好的閱讀習慣，擴闊他們的閱讀範圍和知識，提高他們運用語文的能力，並鼓勵家長積極參與子女的閱讀活動。

由於小霸王年紀細，我地只可以參加

家庭組(幼稚園至小三，由家長陪同)

呢個計劃由由每年的 9月1日至翌年的8月31日止，

會員會獲發兒童及青少年閱讀計劃「閱讀足印」記錄冊一本，以記錄會員的閱讀進程。

凡閱讀 6本書籍或以上，可獲頒發證明全年閱讀書量的證書。

一個可以讓小朋友睇多D 書的機會

又係一個免費的親子活動

你地參加左未呀?? 快D參加啦!!

PS: 

一年閱讀 6本書，應該唔係一件難事吧!! 加油! 

目標係有咁多睇咁多

兒童閱讀計劃: https://www.hkpl.gov.hk/tc/kids/reading-programme/intro.html

Welcome to S.K.Y. Lovely Family

MyBB試用小隊: 嘉寶®牙仔餅及肉桂獸型曲奇餅

多謝 MyBB 的邀請    讓小霸王有口福啦!

 登~ 登~登~登~

係小朋友見到都想食的

嘉寶®牙仔餅及肉桂獸型曲奇餅

從1928年開始，嘉寶®嬰幼兒食品系列首次在美國推出， 

多年以來，一直細心聆聽及了解父母和寶寶的需要，

並不斷研究、發展及改良旗下的嬰幼兒食品，

致力為全世界父母提供高質素的嬰幼兒食品。

嘉寶®嬰幼兒食品不含防腐劑，每款原材料均在新鮮採集及處理後立即包裝，

確保衛生及保持食品中最佳的營養，

所以每款嘉寶®嬰幼兒食品可保存約1年或以上而依然保存住其中的好營養。

首先介紹的係

肉桂獸型曲奇餅

一打開袋仔     就會見到多款唔同動物形狀的曲奇餅

♥ 好鬼得意可愛 ♥ 唔大亦唔細片

小朋友仔可以自揸住黎食都得

♥ 全縠物製造，不含人造香料、色素及甜味 ♥

曲奇餅唔會太硬，質地鬆軟

輕輕咬一啖， 有小小肉桂味， 食完想再食呀!

牙仔餅

叫得牙仔餅，咁當然係for 一 d 開始學習咀嚼的小朋友

比較曲奇餅，牙仔餅相對地係硬 d 、大塊d

♥ 形狀上設計是凹凸型    就返小朋友手仔  (貼心♥) 

♥ 全縠物製造，不含人造香料、色素及甜味 ♥

淡淡的雲呢拿味， 好適合小朋友

當然小朋友唔應該食太多餅乾   但閒時當做一個小獎勵都不錯

相信嘉寶推出的星星餅、乳酪乾     

好多家長小朋友都有試過    因為真係好受歡迎架! 

大家不妨都試下

呢款牙仔餅及肉桂獸型曲奇餅吧!!

** 嘉寶:  https://www.nestle.com.hk/brands/baby/gerber **

** 謝謝 My BB.COM **
** 以上產品由品牌提供 **
Welcome to S.K.Y. Lovely Family

♥ 暫別了，我的表舅父、表姨 ♥

話咁快就一個月啦~ 小霸王暑假完結

而英國回來的表舅父、表姨都係時候要返去返學囉!

呢一月來，每星期六日我地都見面

一齊食野、一齊去玩、一齊影相

(感情真係深厚左)

說真的，我呢個表姐都係第二次見呢個細表妹架咋

上一次見面 - 2013年新年

MEISZE 同小霸王一樣得半歲左右大

(相信佢完全冇呢個記憶)

相隔兩年多再見    初頭都有點陌生

但估唔到....  好快

我就成為唯一一個可以抱佢的女人 (除左佢媽咪以外)

據姑婆話.... 

因為佢樣子可愛，D 鬼佬成日眼甘甘望住佢，令到佢唔鍾意俾人望

因為外國教育問題，小朋友喊係由得佢的，所以...... 佢係好喊得

總結:  佢唔係一個容易照顧的女孩

(但多謝你肯接受我 ♥)

希望下次見你，你會記得我，會更聽話、更靚女

♥ 好鍾意你甜美的聲音 ♥

唔係正係妹妹可愛， 哥哥都好得意架

我呢個細表弟，好鬼怕醜， 唔多肯俾我影佢

但佢講中文時好攪笑好打耳， 

食外國野、飲外國水係咪都靚仔D架呢?

哈哈~ 多謝你地

♥ 讓我家小霸王過左一個特別的暑假 ♥

♥ 好想你地年年都返黎呀 ♥ 

小朋友多D、屋企就熱鬧 D、開心D 

Miss U all so much 

Welcome to S.K.Y. Lovely Family

♥ 她約他去圖書館 ♥

夏日炎炎真係唔多想出外

之前的數個週末日都同陽光玩遊戲

呢個週日就休息一下吧~   玩靜態 D O既野~ 

去圖書館   涼泠氣  靜靜地睇書書

小霸王都叫做 OK愛睇書的小朋友

平日在家~  佢會搵爺爺陪佢睇

晚上~ 就一定係我做書僮

呢日辛苦你啦!~ 公公 ~  陪乖孫睇書書~ 

(平日我做得多啦~ 放假就拜託你一下 ♥)

望住眼前的畫面，我就不敢想起自己年幼時

公公陪我去圖書館??  → 記憶中係零囉!!

公公陪我睇書書??  →記憶中都係零囉!!

♥ 哈哈~  ♥

當年公公要搵錢養家   何來有咁多時間陪我地呢?

 就正如而家o既我同爸B 咁   要工作  不能無時無刻陪住小霸王

所以我都好感恩上天   令我家的小霸王好幸運、好幸福

有勁愛錫佢的四大長老 (爺爺嫲嫲、公公婆婆)

有同樣咁愛錫佢的姨丈、姨媽、舅父、舅母、細姨

會陪佢玩、笑的家姐仔、細佬仔、細細佬

從不拒絕佢的 Sandy姨姨

當然....仲有姑婆啦... 丈公啦.... (數不完) 

講返正題... (又走左太遠)

得閒去下圖書館   真的不錯

可以讓小朋友對閱讀產生興趣

由小朋友自己揀選自己鍾意睇的書   都係一個小訓練

大人陪佢一齊睇亦可以從中學習多些 

不過大埔圖書館比起火星圖書館   

真係細好多、兒童圖書都小d

火星的兒童圖書館真係好正，又大又舒服

♥ 踏入K1  新目標 ♥

就係希望我能夠多帶小霸王去圖書館 

或者多借圖書返屋企俾佢睇

Welcome to S.K.Y. Lovely Family
Date:   2015.08.23 (Sat) ~ 3y1m10d 
Place:  大埔圖書館