笑笑小語錄 @ 38 個月

笑笑小語錄: 

【攪笑事例  (一)】
有晚放工返到屋企，我沖涼洗完頭坐低吹頭時，小霸王好急咁跑過黎搵我....

小:  媽咪
我:  咩事呀?
小:  我個鼻鼻有小小塞呀?
我:  咁有冇流鼻水呀?
小:  冇呀! 淨係塞塞咋! 你今晚瞓覺前幫我搽 RC啦!!
我:  咁有冇咳咳呀?
小:  冇呀!  唔洗搽 Peppermint
我:  不如而家幫你搽 RC啦! 等你鼻鼻舒服 D 嘛!!
小:  唔得! 瞓覺前先搽架! 同埋草草, Peppermint 一齊搽先得
我:  咁呀! 好啦! 瞓覺前先幫你搽啦!
小:  唔!

** 估唔到小霸王會愛上EO 精油，佢而家已經能夠分到平時搽開的精油名字及味道，仲知道幾時/咩事要搽邊支，真係笑死我! 有時仲會幫爸b 搽埋 **

【攪笑事例  (二)】
那天我地興高采烈地買左個 BB公仔俾小霸王，點知.....

小:  媽咪，我係BB個媽咪呀!~ 
我:  吓? 咁我呢?
小:  你咪係婆婆囉!
我:  咁爸B 呢?
小:  爸B 都係爸B 囉! (吓? 我個老公係佢老公????)
我:  哦!~  咁你要好好照顧我個乖孫啦!  (估唔到我咁快做人阿婆?)
小:  知道啦! 咁嫲嫲係咩呀?
我:  嫲嫲咪係太嫲囉！　爺爺咪太爺囉！
小:  太嫲，你快D 過黎幫BB沖涼啦!!  餵 BB 飲奶奶啦!! (佢即刻走去佢嫲嫲身邊講)

** 哈哈~ 真係笑四人呀! ***

【攪笑事例  (三)】
那天我倆諗住去圖書館睇書，由於未食早餐，所以就... 

我:  BB，我地去買包包當早餐，食完就去圖書館，好唔好?
小:  哦! 好呀! 我地去買朱古力包啦!
我:  好! 咁你帶我去買啦!

去到西鐵站佢已經遠遠指住山崎麵包
小:  媽咪，呢到買朱古力包架!
我:  哦! 咁你自己揀啦
小:  我要呢個朱古力包 (話咁快就見到)

** 平時我好少會俾佢食朱古力的，但放假就...... 俾小小甜頭佢啦! 一個朱古力包就可以咁滿足，我諗我要多多向小朋友學習，咁應該個人會開心好多 **

【甜心事例  (一)】

我每天都會帶飯返工作午餐的，但冇記性o既我成日出左門口先知唔記得攞，於是小霸王就做左小管家啦!

我:  BB，Bye bye and see u tonight!
小:  Bye bye 媽咪, see u tonight!
小:  媽咪，你記得攞飯返工呀!
我:  知道啦! 而家攞啦!
小:  唔好唔記得呀!

** 有左呢個小管家，我真係唔會唔記得帶飯囉! **

【生氣事例  (一)】

踏入K1 Terrible 3 後，小霸王脾氣及耐性真係差左好多，個人易炆之餘，仲鍾意發自己或其他人脾氣。之前佢比較細膽的，但而家好似以為自己好大個乜都做得.......

呢日，帶佢去室內Playground 玩，點知佢居然.... 企係到 sir 滑梯，我話咁樣好危險唔得、會整到的。 佢完全唔理，我亦由佢試 (小朋友唔試唔死心)，最後 pat pat 受罪。不過佢居然唔出聲嗌痛/喊 (佢個樣俾我知佢係痛)，於是我就開口問佢.....

我:  BB，你知唔知企係到 sir 滑梯係唔o岩架? 好危險架!
小:  ...............
我:  會整親架，你知唔知? 所以唔可以企係到 sir 滑梯
小:  唔係唔o岩架!
我:  企係到 sir 滑梯係o岩?? 冇錯??
小:  係架! 冇錯架!
我:  咁唔好玩啦! 我地返屋企!
小:  唔玩啦! 我地返屋企啦!

一出到外面，佢要求我抱佢
我:  唔抱! 媽咪唔會抱你，你大個女啦! 唔洗人抱
小:  唔係大個女呀!
我:  唔係?? 咁點解你會話"企係到 sir 滑梯係o岩，自己冇錯"呢?
小:  沂沂冇錯
我:  竟然你話你冇錯，咁你企係呢到冷靜下  (佢開始喊)
小:  呢到唔係屋企，唔可以企係呢到
我:  你都唔知錯錯，咁咪要冷靜下諗下囉!
小:  唔得架!
我:  ......... (無奈地拖住爆喊的小霸王行返屋企)

一路行，佢不停要求我抱抱 (因為佢知道我嬲緊佢，佢用抱抱黎令我唔記得件事)，我拒絕亦選擇唔理佢，最後.... 佢居然扮腳軟跪在地上，第一次我唔理佢，話佢知"你唔行我就走"，佢就跟住行，點知佢又黎第二次....

我:  媽咪唔會抱你，因為你大個女啦!
小:  唔大個女
我:  你明明錯左，但你都硬頸話冇錯，唔認錯
小:  .............
我:  小朋友唔需要咁硬頸，媽咪完全冇鬧過你
小:  有呀! 你鬧沂沂
我:  我同你講道理咋喎!   明明企係到 sir 滑梯係唔o岩，你都話o岩
小:  ....................
我:  錯左，認錯先係好孩子。唔洗咁硬頸!
小:  咁沂沂錯啦!
我:  咁錯左要講咩?
小:  冇野講架! 錯左冇野講架!  (佢知要講"sorry"，但唔肯講)
我:  咁下次仲敢唔敢企係到 sir 滑梯?  (我知佢要面子，見佢讓步我都唔迫佢講sorry)
小:  唔敢啦! ~  媽咪抱抱沂沂
我:  好啦!~ 過黎媽咪抱抱

*** 係呢件事上，我發現小霸王硬頸度係爆燈囉!  有一刻，我真係好灰好難過，我真係唔知點去教佢先好?? 硬碰硬一定反效果，軟? 我又怕佢脾氣會更野蠻......  所以.... 食得甜野多係要品嚐下d 苦味!  ***

【苦惱事例  (一)】

每晚我倆睡前關燈後都會有小小時間係傾下計，多數我都會問下小霸王o個日學校的情況，食咩茶點呀? 開唔開心呀? 學左d 乜呀? 做過d 乜呀?.... 只要佢肯同我分享，講乜都冇咩所謂，最重要係佢肯share!

有一晚，佢傾傾下好似唔多想講，但又好似想我問佢咩事.....

我:  你係咪唔開心呀?
小:  係! 沂沂唔開心
我:  發生咩事? 點解唔開心o既?
小:  沂沂唔開心，想流眼淚  (佢手仔已經開始抺眼睛)
我:  唔洗喊架!  有乜唔開心都可以同媽咪講
小:  沂沂唔開心囉! ~
我:  係咪學校呢?
小:  係囉!~
我:  老師話沂沂??
小:  唔係囉!  媽咪話沂沂
我:  吓? 媽咪都冇話沂沂，沂沂嬲媽咪?
小:  係! 嬲媽咪
我:  你今日茶點食乜野?  (佢一講嬲媽咪，我就開始知道係關茶點事)
小:  餅餅囉!
我:  哦! 食小小餅餅得架! 媽咪俾你食架!  咁仲有呢?
小:  紫菜囉!
我:  哇! 仲有沂沂最鍾意的紫菜呀!
小:  係囉! 沂沂met 走左佢
我:  點解呀?? 你好鍾意食架喎?
小:  紫菜辣o既，met 走左佢
我:  哦! 原來係沂沂食唔到紫菜，所以唔開心，係咪?
小:  係囉!~
我:  傻豬~ 唔緊要，今次食唔到，下次仲有得食架嘛!  媽咪明天買一包俾你食，好唔好?
小:  唔得架!  唔要囉~
我:  咁呀!~ 唔緊要啦~ 媽咪同老師講唔要辣紫菜啦~
小:  唔!!~
我:  咁你唔好唔開心啦!
小:  沂沂都係唔開心
我:  ...... ................. (唔再問下去，o個刻我唯有抱抱佢，引下佢笑令佢忘記唔開心)

*** o個刻見到眼有淚光的小霸王我真係好心痛，我係到諗? 係我面前的小女孩真係得三歲多嗎?  如果我冇留意到的話，佢係咪會將心事一直埋在心裡呢?

- 茶點係我的角度係一件好小的事， 但原來係佢心中唔係囉!
- 其他小朋友應該會直話直說，但小霸王選擇將唔開心的事收埋在心裡，唔細心留意根本可能唔會察覺

*** 呢件事後，我發現我要更加小心觀察、多留意、多關心佢 ***

Welcome to S.K.Y. Lovely Family