搶閘出世

2012.07.13 (Fri)

今日原定是請了假做例行產檢的日子，
但她卻破壞了我的...計劃。

02:30
如常去廁所返上床瞓，冇乜事..

02:45:
有種奇怪的感覺，就去廁所睇下，發現... 有血水，心諗唔係生得嘛?? ... 唔信.. 睇多陣先

05:30:
又去廁所, 仲係有血水，唉... 唔得啦!!
就返房同老公仔講
我: 好似生得呀!
老公仔: 入院啦咁，但我今日鋪頭要開門wor...
我: 咁我叫99陪我去，到時生得call 你啦!! 你記住聽電話呀!!
沖完涼洗埋頭就出發去TMH

05:55:
到達醫院，直上七樓，因為唔係 9-5，所以要去T7產房。
入到去做晒檢查先發現，我唔只見紅仲已經穿埋水，
吓... 一d 都冇"漏水"的feeling wor
由於子宮頸一度都未開，但又穿左水要留係產房。
入到去第一件事就當然係..."種豆"啦!!
因為產檢時驗到有B 型鏈球菌，所以必須打抗生素。
o個個唔知係咪新人的醫生，種豆種左3次先得，左右手都俾佢種過晒
唉... 為左阿b 冇計... 但求種到...

08:00:
醫生循房，話未開又唔識痛，要打催生針，咪打囉!!
阿姐俾埋杯粥水我飲，仲話飲晒佢呀.. 唔係就生完先有得飲同食架啦!!
哇... 咁我梗係飲晒啦!! (都唔知要等多久)

開頭都冇乜反應， 但漸漸地.... 支針開始黎料..

10:xx:
唔知咩時間，見有個姑娘行埋黎，

我: 有冇開度數?
姑娘: 冇呀.. 冇咁快...
我: 唔係ma... 一度都冇??
姑娘: 呢d 痛都未叫痛呀!!
我: 唔係5 mins 先痛一次架咩，點解我 1 min 痛一次架!!
姑娘: 係呀! 因為你要痛多d !
我: 吓... 唔啦.. 咁我要打"無痛"
姑娘: 我試下安排下

過左一陣間，
姑娘: 醫生做緊手術，我地亦有通知麻醉師，但未知佢地幾時可以，你要等下。
我: ok, 我等.. 但仲有冇其他可以止住痛呀!!
姑娘叫我聞氣，唉... 聞囉!! 唔係點好...

估唔到... 聞氣對我黎講係有效wor
聞到 high high 地都唔知過左幾耐.....

12:00:
wing wing 地的我又問姑娘

我: 點呀..開左幾多呀
姑娘: 3 度到啦...唔係wor... bb 頭仔好低，要入產房

入到產房，姑娘話 99 o係外面問我咩狀況叫我打俾佢，
大佬... 鬼記得 99 電話咩，仿且咁痛...
咪打俾老公仔叫佢同99 講囉.. 話未得呀

12:25:
我: 姑娘呀.. 生得未，我洗唔洗打俾我老公呀!!
姑娘: 你打定叫佢stand by啦!!

我咪急call 老公仔，佢話5 mins 內到。

一收線...
姑娘: 你生得啦... 等唔等你老公呀
我: 下... 唔等啦.. 等得到咪等囉!!
姑娘: 咁你一痛就用力生啦!!

12:35:
老公仔終於到左...
見到佢真係好開心，勁想喊
痛到死的我...
o係姑娘、醫生、老公仔的鼓勵、責罵同支持下，
用晒我全身的力氣... 生...

13:00
BB 終於出世啦!!
重2.36kg，是細碼B
恭喜晒....