隨住小霸王公主的暑假來臨
我終於可以..... 同大抽獎遊戲Say bye bye
(小六先再見啦~ 俾我休息下六年咁多.... )
說真的，話唔緊張.... 係假啦!
不過真係... 唔到你唔緊張囉
由 K3 開學日開始，到 K3完結
呢一年，心情真係... 唔太好過, 好難用文字一一形容
(相信經歷過的父母會深深明白)
以下呢個就係 『2018龍年令人緊張又興奮時間表』
(每年九月必定有一個新的出現)
記得K3開學一星期多後，
幼稚園就攪左個家長會講解一下呢個大抽獎的流程
教你點填表? 提你點交表? 幾時交表?
俾張副本你試填，跟住交返幼稚園，
班主任仲會幫你睇下有冇填錯
交表前一, 二天先派張正本你跟住填
25/9 ~29/9 將"自行分配學位表"交到心儀的小學
第一步完成架啦!!
慢慢長夜地.... 等兩個月....
27/11 自行分配學位公布結果
點公布? 就真係視乎學校
有的... 貼在學校告示板
有的.... 在學校網頁
我呢... 幸好可以在學校網頁在上睇到結果 (唔洗請假)
準時 9:30 打開 PDF檔案
好似對抽獎劵咁....搵下有冇你的8位號碼
當然... 唔中啦!~
小霸王公主 冇哥哥姐姐, 冇父母畢業生....
15分咋.... 點爭呢????
玩完第一步，又俾你休息兩個月先再玩
其實都冇休息，呢兩個月都係不停地資料搜尋
第一志願就唔洗諗
要諗的.... 係其餘 24間點排好
排完又改，改完再排.....
3/2 前往統一派位中心辦理選擇學校手續
由於當日先會收到正本及即時填表
o個刻真係要"金精火眼" 因為真係驚填錯囉!!
好彩我係屋企填定張副本，去到照抄咋!
所以.... 唔洗10 分鐘就完成手續
第二步完成架啦!!
冇錯.... 跟住又係要等... 呢次等四個月
哈哈~ 今次真係可以等....
冇乜野做.... 直至....
公布結果前的 1-2星期 (即5月中至底)
家長們就要上心儀的小學網頁
留意下叩門資料
叩門要準備d 咩文件?
申請表? 相片? 出世紙? 校長信?
K1-K3成績表? 家長自薦信? .....
(我大約Print 左5-6間小學，我冇準備portfolio)
2/6 返回遞交 『選擇學校表格』的統一派位中心領取「小一註冊證 」
(即係派彩日)
派彩時間 9:30先開始
呢日，我 9:10到達.... 已經係排晒長龍
9:30 準備入禮堂等收派彩紙
哇!! 真係堅緊張囉!! (腳都震晒)
職員攞張小一註冊證俾我時
我一睇.... OMG.... 第一志願呀!
O個刻真係YEAH左出黎囉!!
超級開心 超級開心 超級開心
即刻同爸B及家人分享
自己真係忍唔住喊，一路講一路喊
仲九秒九跑去幼稚園跟學完畫畫出黎的小霸王公主報喜訊
母女抱在一起分享O個刻喜悅 真係令人難忘
感謝上天保佑 !
好開心 呢個遊戲正式完結
而幸運地派到第一志願 不用四處叩門
還記得上年身心疲累十月
小霸王公主因為K3 分離症令到佢唔肯去某直資 2nd In面試
自動放棄... o個刻我真係好唔開心
(我堅嬲左小霸王公主兩星期)
幸好唔洗再玩多次面試
唔係我真係....
不過今年.... (我指72網) 好多間小學都係要
111 先會派表 / 111 先收表 / 111先 接受面試
有同學仔 叩左八間都唔成功
自問我唔係專家 只係其中一個參與遊戲者
份表點填先好??? 點排?
冇一個正確玩法
因為呢個遊戲 LUCKY先係最重要!!
衷心祝福
往後會玩呢個遊戲的家長們/小朋友們
希望佢地都能 幸運地入到心儀之選!!
