▌日劇推介 ▌ 我的帥管家 (メイちゃんの執事)

我的帥管家

主 演：水嶋宏 榮倉奈奈 佐籐健 山田優 向井理
故事梗概:
從小是普通小喫店老板女兒的東雲芽衣，某天父母因事故身亡隻留下她一個人，卻突然出現一名男子，告知芽衣是日本第一財團本鄉家的繼承人。為了把芽衣培養成真正的名門淑女，她被送進了著名的聖露琪亞女子學院。

這裡所有人也和芽衣一樣，身邊都跟著一個英俊的男管家。不同的是，大家都是真正的淑女名媛，無法適應上流社會生活的小梅和所有人都格格不入。再加上喜歡芽衣管家的人是學校裡的老大，芽衣本來平凡簡單的生活真實發生了翻天覆地的變化

呢套日劇去年已經播咗，但係近排J2 先播，睇咗第一集之後，覺得幾吸引... 就上網追晒10集，雖然呢套劇唔係以愛情為主，但係... 唔知點解就係吸引人去睇wor... ^^ .. 可能太多靚仔掛...
當然男主角水嶋都唔差啦... 佢的笑容真係殺死好多女仔呀... 哈哈...

推介: ★★★★☆

腳傷了....

不知道何解由昨天開始右腳底開始痛，初時以為只係小小痛唔鬼理，照去行街街。 點知，到咗夜晚都仲痛，搽咗安美露舒緩一下先瞓。
到咗今朝，哇,... 勁痛!! 著好晒衫落咗樓返工，行到巴士站真係頂唔住，最後都係請假睇醫生 + 休息下，醫生話拉傷咗條腳筋小小，打咗支針止痛，二日後唔得就返去覆診，希望唔洗返去吧!! 好彩媽咪去咗日本旅遊咋... 唔係實俾佢鬧爆..^^
祝願我的腳早日好番吧!! (唔想再打針呀!! )

▌美妝 ▌ISQUEEN BB CREAM + LOTREE 碎粉

上個星期睇新MONDAY- HONEY 介紹呢隻BB CREAM，一見到係紫色... 哇.. 就吸引住我啦!!
咁咪星期日去MANNINGS 睇下幾錢啦... 又唔貴WOR.. HK$138 仲有玫瑰蘆薈HAND CREAM 送，梗係買黎試下啦!!

↑ 用後感... 覺得都唔錯.. 我覺得好過SKIN FOOD o個隻LAW!!
另外，行開COLOURMIX，諗住買碎粉... 經SALES介紹下買左呢隻韓國LOTREE(當然又係鍾意佢係紫色啦!! HAHAHH..)，我唔知係咪算貴 ... 要HK$260.. (送埋個細盒FOR 出街)

↑ 用後感... 唔錯.. 好自然.. 對於唔多化妝的我就VERY GOOD... ^^

三年前的今天....

三年前的今天.... 我失去了牠....
原來已經三年啦... 時間走咗，但係就冇帶走埋我的傷痛、我的思念... 我真的很想念牠 - 我的心肝寶貝。
唔知道佢O係天國的另一方正在做緊咩呢?? 有冇掛住我呢?? 幸福嗎??
我好想話佢知... 老公仔已經實踐我地三人約定的承諾啦... 我知道仔仔佢會好開心，因為媽咪嫁得出... !! 唔知仔仔有冇搵到女朋友仔呢??
仔仔... 好耐冇夢見你了... 媽咪今天特別住你呀... 好多話想同你講，但係唔知點解總是說不出.... .. 我真係冇用呀...
**************************************************************************
今晚我獨自一個食晚餐.. (因為老公仔返夜, 奶奶出左街) ，一個人咪o係屋企留下的美心隨便叫個石頭鍋飯食，一路食一路望下周圍... 見到好多人都係獨自一個食飯，當然以男人比較多，突然覺得好唔開心....
我在想... 爸爸每天都係自己一個食飯... 原來係好孤單架... 而我起碼都仲有奶奶陪下，(我諗我要多d 陪下爸爸食飯!!) 如果日日都自己一個人.... 唔知我會變成點呢?? 好強烈的失落感覺呀.... 我唔要呀...
未結婚前..我都唔係好怕孤單.. 點知結咗婚之後，好唔想自己一個人呀... (多麼的希望老公仔可以每天陪住我呀... 我知道冇呢個可能，而我亦唔想令佢唔開心!! 唯一辦法... 努力學習一個人吧!!)

↑ 美心的石鍋飯... 一般啦!! 多d kimchi 會好好多!! ^^

回顧2009

2009 年轉眼間就過左啦!! o係呢一年，我可以話將全部時間放o係結婚事上，所以感覺都幾充實。

2009年對我黎講，原本以為係一個完美的一年，因為可以在父母及好朋友見證下結婚，嫁個好老公，再加上家中的小姨甥女亦帶俾我地好多歡樂 …
只可惜o係2009年最尾的一天，就打破左呢年的完美… 親愛的姑婆離開咗我地!! 雖然家人講「哇… 姑婆都90幾啦… 我地應該開心而唔係傷心。」，但係… 對於我黎講，第一次要面對至親離去，點可以唔難受呢?? 唉… 只好將它收藏於心內… 笑住跟姑婆告別!! 姑婆…. 我地會想念你的!!

人生就係咁… 一定會有開心同唔開心的，冇野係完美，咁先叫做人生嘛!! 係咪??? 我而家只求2010年我同我的屋企人都身體健康咋….^^

結婚一個月

今日係我地結婚一個月的大日子，估唔到咁快過左一個月啦!!
唔.. 好多野都漸漸開始習慣起來，最唔習慣應該係俾人叫做『表嫂』囉!! 感覺好老呀... 好彩我d 朋友仔唔會叫我『李太』咋... 唔係真係打死佢地呀...

20091224 平安夜@ 屯門市廣場

今晚難得老公仔可以準時收工，當然要過下二人世界啦... ^^ 呢個係我地結婚之後,，第一個X'MAS...

聖誕大餐... 我選擇左去食我至愛的日本菜.. 好好味呀!!! ^^

我地去咗屯門的『金水壽司』, 估唔到... 好好味呀... d 魚生好新鮮.. 正.. 二個人食咗三百幾蚊, 勁抵.. .. 好彩有老公仔表妹的幫忙咋... 唔係真係等到收鋪先有得入去食呀... thanks.

食飽飽... 當然去shopping啦．．．　今日就冇收穫囉.. 寄望明天有吧.. ^^
行行下... 見到就快有歌手表演, 咁咪停低睇下囉... 不過出席的砍手就唔係太吸引，只有EO2 同瑤瑤...

我地唔等倒數就走咗, 走前見到otto 企o係旁邊，咪試下同佢say hello及握手, 再睇下佢肯唔肯同我影相，點知... 佢又肯wor... ^^.. (吓... 淨係得我影到咋... ^^) 佢都算nice 同冇架子，希望佢星途能夠發展得順利吧!!

其他成員都肯影架... 只係佢助手話要轉頭先, 唉.. 算吧.. 轉過頭, 我返咗屋企囉!!