Little M 親子教室 ※ 牛油曲奇 (印模) ※

Little M 親子教室 ※ 牛油曲奇 (印模) ※ 

每星期相聚的時間，即係又到左小朋友要上家政堂啦!!~

初階者的我們，呢個星期繼續以曲奇為題

為左令小朋友享受多D樂趣

今次就整印模牛油曲奇，仲準備埋朱古力唧唧漿俾佢地畫下花

材料:

低筋麵粉 200g

牛油 100g

糖霜 80g

蛋黃 1隻

幼鹽  少許

STEP:

● 將牛油打至軟身

● 加入糖霜、幼鹽繼續打至白又輕軟

● 加入蛋黃，打至均勻

●  分三次慢慢篩入麵粉, 拌勻

●  用手輕揉成麵團，放入保鮮袋，冷藏15分鐘

● 碌平麵團, 用曲奇模印出形狀

●  預熱焗爐，再用 170度焗 10-15分鐘
●放涼，再用朱古力漿畫上花紋

下面就係當日三個小朋友的完成品

(大部分都係未入焗爐)

入得口，見得人! 抵讚!

係製作曲奇過程中，今次仲教埋佢地認識不同的材料

等佢地知道自己做緊乜? 用緊乜? 

大成功! 下次再黎過!

Welcome to S.K.Y. Lovely Family

Little M 親子教室 ※ 朱古力曲奇 ※

上星期六，姨媽媽突然話想整下野食

好啦! 咪整囉!

點知.... 佢話... 唔係我整... 係要我教三位小朋友整

咪玩啦~ 吓????? 

見佢買晒材料咪即管試下

Little M 親子教室 ※ 朱古力曲奇 ※ 

上堂啦!~ 

歡迎三位完全未整過野食的小港女/男

(你睇下佢地幾開心、幾期待)

因為始終佢地都係第一次，加上年紀仲細

所以材料+份量預先有我準備好晒

佢地跟STEP 做就可以! 

READY! 

材料:

牛油 100g

糖 75g

雞蛋 1隻

低筋麵粉 150g

可可粉 2湯匙

碎朱古力粒 適量

STEP:

● 將糖倒入牛油，拌勻

● 之後加入雞蛋，再拌勻

●  用篩慢慢加入麵粉及可可粉

●  所有材料一齊拌勻

● 之後把曲奇料做成任何形狀，隨意放上碎朱古力在表面

●  預熱焗爐，再用 170度焗 10-15分鐘

估唔到全個過程，有九成係小霸王自己做

我只係幫左佢小小咋!  (難道... 佢都好鍾意整野食?)

雖然賣相一般，但味道都不錯

♥ 最重要係小朋友有得玩又有得食 ♥

期待下一堂.... 真係要諗諗整乜好!!

Welcome to S.K.Y. Lovely Family

A.T.O.D. Exam Level 2

早於去年尾已經為小霸王報左名

考 A.T.O.D. Exam (澳洲舞蹈教師協會) 同 R.A.D Exam (英國皇家舞蹈學院)

報咁多??? 冇計.... 

未知道佢鍾意芭蕾多d 定係爵士舞多d ??

二月時，學校的 A.T.O.D mock up exam 

就因為發燒冇去到

三月時，學校的 R.A.D mock up Exam

就第一次去總校考，成績都ok

話咁快，四月七日就係正式考 A.T.O.D. Exam

我心情應該俾小霸王更緊張

唔係怕佢Exam result ..... 而係怕佢會..... 喊

唉.... 怕的原因???

- 佢最好的朋友仔冇報考呢個

- 家長不用梳髻，學校會攪掂 (唉... 勁怕佢唔肯囉!)

- 陌生環境.... 實搵我....

為左令佢唔好咁依賴我，呢日我只係放半日 (佢考下午)

由爸爸照顧佢同埋帶佢黎總校等我

爸爸話：　佢好乖！好聽話!

(冇我係到，佢肯跟爸爸)

考試前都盡量令佢開心同放鬆

時間到要入校準備，佢都肯乖乖跟住 Annie 姐姐/ Miss Ho 入去

而我就係校外等一陣先 (怕佢扭計)

直到 Annie 姐姐話:  

『媽咪，Miss Ho幫佢梳好髻，乜都攪掂啦! 佢同Miss Ho仲好好傾，

放心啦! 你一陣先返黎接佢，有乜事我打俾你啦!』

哇!! o個刻真係好意外同好感動囉! 

唔敢相信..... ♥ "終於都大個女啦!" ♥

我真係可以放開手了! ^_^

雖然佢考試期間我手機不敢離手，但最後手機都冇響過

可以叫做放心晒!

考試完啦! ~ 結果好似要等到十月先知 (咁耐???)

不過唔緊要啦! 無論個結果係點，小霸王佢呢日的表現已經係好好了!

小小的年紀就無謂要佢知道考試係乜啦

開心地享受o個過程 (當上堂) 不是更好嗎?

Welcome to S.K.Y. Lovely Family

CATALO ● 兒童DHA活腦補眼配方

相信好多媽媽們就算未用過，都一定知道 / 聽過 CATALO

小FAN 我都係其中一個

我係聽過 同埋睇過 CATALO的廣告囉

CATALO代言人係靚靚 (袁詠儀) (私心的 ♥.... 我係幾鍾意佢架♥)

所以對 CATALO都有D印象  哈哈~ ♥

唔講咁多提外話.... 先多謝 ♥ CATALO PR姐姐送上產品試用 ♥

今次有幸試一試的係

CATALO ● 兒童DHA活腦補眼配方

• 兒童DHA活腦補眼配方特選優質天然無污染深海魚，採用獨特先進科技，製造出每食用份量提供200毫克DHA精華，針對補充兒童腦部及眼睛發展所需的重要元素，更能改善容易敏體質，維持身體健康，是精靈兒童必備的優質奧米加3魚油。
• 兒童DHA活腦補眼配方更選用特製小型天然咀嚼軟膠囊，並加入天然鮮橙精華，粒粒都如香橙三文魚籽般，美味容易食，令兒童愛不釋手!

	美國cGMP認証廠房製造 美國cGMP認証廠房製每款高級健康食品百份百原裝進口，品質均達國際標準
	CATALO 品質保證 CATALO承諾每件天然健康食品均堅守：有功效，純天然，高效能，絕對安全的四大原則，為顧客提供最優質產品，保持健康美麗

主要功能:

• 促進腦部發展，頭腦更聰明，IQ更高
• 促進眼睛發展，視覺更敏銳
• 使腦部思考更靈活，加強學習能力及集中能力
• 有助改善過敏體質，維持身體健康

 食用方法:

• 6個月幼兒至3歲兒童：每天1粒，可刺穿軟膠囊將魚油加入食物中食用或直接食用
• 4歲或以上：每天1-2粒，請於餐後食用
• 特製軟膠囊適合咀嚼吞服或刺穿後將魚油加入食物中食用

打左咁多文字，係時候講下我的用後感

新產品不論係我的 / 小霸王的

我都會盡量親身試用左先 (有時係小霸王要我做白老鼠先)

細細粒的魚油軟膠囊  一放入口咀嚼幾下就已經KO左

濃濃的橙味蓋過晒D魚油味，唔洗怕小朋友唔鍾意食

我個人亦都試過刺穿膠囊放入匙羹食

唔.... 有點兒油囉!  所以我覺得直接放入口食會好D 

如果小朋友係鍾意食糖的話，咁不如食魚油軟膠囊不是更好嗎?

係咪? 

小霸王: 想好似我咁有記性，咁就要快D 試下啦!   (設計對白)

** CATALO: http://www.catalo.com.hk/product-detail.php?pid=102&id=135&parent=240

** 以上產品由品牌提供 **

Welcome to S.K.Y. Lovely Family

笑笑小語錄 @ 44 個月

※【甜心事例  (一)】※
上次整芒果糯米飯+韓式拌飯時，多得我家小霸王幫忙碌記下要買乜，唔係一定買漏野......

我:  BB，我地今日要買好多食物，我話你知我要買乜，你提下我好嗎?
小:  哦! 好呀!
我:  我地要買芒果、糯米、椰漿整芒果糯米飯，仲要買牛肉、豬肉、芽菜 、菠菜、甘荀整飯
       (望住我張手寫紙讀左一次俾佢知)
小:   哇.... 要買好多野喎!! 
我:  係呀! 所以你要提提我呀! 唔該晒
小:  咁我地快D去買啦! 

♥   小霸王的記性真係俾我預期犀利，佢真係一路行一路提下我有乜買，以芒果糯米飯的材料佢最記得，佢到而家都仲記得...... (成日都話整芒果糯米飯我食) ♥

※【甜心事例  (二)】※
事緣某日在XX 樂園中左部玩具琴，琴上面印左數字音 (1234567)，仲附上一張電子琴譜，咁我就教小霸王彈下，琴譜得2首佢識的兒歌 (Happy birthday & Are you sleeping) ，估唔到只係教左佢一晚，佢第二晚已經可以唔洗睇琴譜就彈到o個2首歌....OMG..... 見佢咁有興趣彈就上網搵下有咩簡單兒歌，最後我印左接近十首俾佢 (放心.... 未識晒，哈哈!) 但係....每晚佢都....

我:  BB
小:  媽咪，你返黎啦!!我:  係呀! 錫啖先
小:  媽咪，你今晚有咩新琴譜俾我呀!
我:  BB，你都未識彈晒，同埋都冇咁多琴譜
小:  我識彈好多歌啦
我:  我知呀!識彈晒迫先再搵啦!

♥  唉! 每晚放工唔再係迎接我..... 係迎接新琴譜???  都係時候諗諗.... 係咪俾佢學下彈琴? ♥

※【甜心事例  (三)】※
雖然小霸王近期外表同衣著上似返左小小小.... 女仔，但係佢本質都....係男人頭多D，粗粗魯魯咁 (完全似晒我)，所以佢特別鍾意親親大自然..... 一有機會俾佢，佢一定唔會放過... 淋花!

小:  媽咪，我可唔可以淋花呀!
我:  可以! 不過要小小水咁淋架!
小:  哦! (奸笑樣)
我:  BB，你唔好淋咁多水，佢會死架!
小:  唔好架! 我淋水俾佢，佢會長大架! 
我:  要淋水，但唔好太多水
小:  淋水，佢就會長花。 (佢對住D植物講: 我淋D水水俾你地，你地要乖乖長大呀!)

♥ 哈哈!  真係笑四我啦!!  佢完全做到"教草"咁款 (Copy我"教囡") ♥

※【甜心事例  (四)】※
有天去左西九長廊，見到好多漁船，我就不期然問返小霸王記唔記得數天前同姨媽一家去左綠田園玩過的船仔，佢話記得....

我:  BB，你記唔記得你自己楂船仔?
小:  楂船仔? 
我:  係呀! 用手仔前後楂船仔呢?
小:  哦! 係呀!
我:  咁你記唔記得你架船仔幾多號?
小:  媽咪你講先?
我:  我梗係記得啦! 29 號嘛!
小:  叮! 你答岩左，係29 號。 咁你記唔記得家姐架船仔幾多號?
我:  吓?? 我唔知喎? 我冇留意
小:  咁你估下啦!
我:  8號?
小:  dodo....你答錯啦! 係 3號!
我:  吓? 真係? 
小:  係呀! 咁細佬呢?
我:  我都冇留意到
小:  咁你估下啦!
我:  4號?
小:  dodo....你答錯啦! 係 10號!
我:  係咪架??? 
小:  係呀! 肯定係! 
我:  咁我信你啦! 
小:  我實答岩架!!

♥ 哈哈!  小霸王的自信心同記憶力真係好強勁!! (我返屋企睇下d 相... 發現真係答岩晒) 估唔到佢對某些事情俾大人更加留意，點解咁講?? 因為我有問返當日都有份去的姨媽/細姨/婆婆佢地記唔記得? 最後.... 佢地係一個都答唔中......  ♥

Welcome to S.K.Y. Lovely Family

可愛的冬菇頭~ ♥ 返黎啦♥

去年堅決要留前陰的小霸王

相隔半年後   終於都肯聽話讓步啦! ♥  (感動到爆囉~ 我)

其實我唔係唔鍾意佢留前陰   

只係平時不論在家 / 返學/ 出街都會把前陰夾起/束起

令到前陰D 頭髮仔開始碎碎地

為左保護頭髮仔  就... 出盡甜言物語 / 法寶 / 堅持....

最後..... 估唔到小霸王肯乖乖地配合

大左半年姐.... 點解.... 會相差咁遠呢?

由於佢只係肯俾我剪   唔肯出外剪   所以.....

技術唔係太好的我    勉強叫做剪到啦! ~  (我會繼續努力的 ♥ ) 

完成啦~ 我的可愛BB 又返黎啦~

包包面重現... 哈哈~ 

私心的我   真係比較鍾意小冬菇

感覺會可愛D~ 得意D~ ♥

左右相片相差一星期咋~ 

真係 BB 左囉~ ♥ I LOVE IT ♥

Welcome to S.K.Y. Lovely Family